Lopez, delos Santos nanghawod sa Don Sergio Osmeña Sr. Run

CEBU, Philippines - Gipamatud-an sa sakop sa Philippine Navy nga si Mendel Lopez nga siya gihapon ang hari sa karsada dihang iyang gilupig sa ginukdanay sa tinuig nga Don Sergio Osmeña Sr. (DSOS) Run, kagahapon diha sa Cebu City Sports Center (CCSC).

Si Lopez, kinsa nakalabang sa lisud nga hagit batok sa mga dekalibreng runners sa Visayas ug Mindanao, mipakita sa iyang kakusog aron pagtapos sa lumba sa oras nga 32:51.718 ug ingon man pagsakmit sa titulo sa 10K open men’s division.

Si Lopez gisundan ni Ben Alejandrino nga mi-oras og 33:14.016 alang sa ikaduhang

dapit ug Critfrancradel Indapan sa Davao City nga mi-okupar sa ikatulong dapit sa oras nga 33:15.652.

Sila si Fernando Subayno Jr. (33:31.459) ug Elmer Bartolo (34;12.716), mitugpa sa ikaupat ug ikalima nga dapit.

Sa laing bahin, subli na usab nga nanghawod si Mary Grace delos Santos sa Zamboanga human gipilde ang higpit niyang karibal nga si Madelyn Carter aron angkonon ang korona sa 10K women’s division.

Si delos Santos, kinsa mao sab ang kampiyon sa miaging  Kapamilya Run, milabang sa finish line sa oras nga 38:25.650, samtang ang Sugbuanang si Carter napunta sa ikaduha nga mitapos sa oras nga 42:16.364. Si Carter mao sab ang runner-up ni delos Santos sa Kapamilya Run.

Laing taga-Davao City nga si Mary Estella Diaz ang miangkon sa ikatulo nga dapit sa oras nga 43:24.629.

Mikompleto sa top five finishers mao sila si Michelle Gilbuena (43:14.609) ug Mary Joy Tabal (45:29.702).

Gawas sa mga tropeyo, sila si Lopez ug delos Santos nakabulsa og P10,000 nga ganting salapi gikan sa   kagamhanan sa siyudad sa Sugbu.

Sa masters A, si Edgardo Carabuena mao ang migawas nga kampiyon uban nila ni Alan Paulinar ug Jessie Misa nga maoy iyang mga runner-ups, samtang sila si Oporto Elazar, Virgilio Vilecario ug Tomas Nuñez Jr. mao sab ang top-three runners sa masters B class.

Nag-una usab si Ruth Banzon sa masters C, gisundan nila ni Marcos Pilari ug Frodencio Igot. Si Adolfo Camillo mao sab ang nidominar sa masters D uban nila ni Demoncrito Brancuela ug Jun Taneo nga mipahiluna sa ikaduha ug ikatulo nga dapit.

Ang maong lumba gipasiugdahan sa Cebu City Sports Commission uban sa suporta sa kagamhanan sa siyudad sa Sugbu ug race director Joel Baring sa Sports and Fitness and Enthusiast. – BANAT NEWS