2009 Milo Little Olympics-Visayas USC: Miratsada sa unang adlaw

CEBU, Philippines - Mihimo og talagsaong labok ang swimmers gikan sa University of San Carlos (USC) diin lima ka meet records ang ilang nabuak sa pagsugod sa 2009 Milo Little Olympics-Visayas eliminations kagahapon diha sa Cebu City Sports Center (CCSC).

Nangulo sa pagpangatake sa USC mao sila si Edgar Jarina, Lister Tungala, Cynthjhune Golden ug Jeb Cane diin mi-oras sila og upat ka minutos ug 51.55 segundos aron buk-on ang 13 na ka tuig nga nalansang nga oras nga 4:57.01 nga namugna sa Sisters of Mary niadtong 1996.

Ang star athlete nga si Loren Dale Echavez

wala sab magpabitin ug mitunol kini sa USC sa ilang ikaduhang meet record pinaagi sa secondary girls 100m freestyle event.

 Iyang gitapos ang lumba sa oras nga 1:02.38 aron pagbuak sa karaang rekord nga 1:04.59 niadtong 2006.

Ang iyang teammate nga si Jabe Cane mihimo sab og rekord sa 100m freestyle sa iyang 59.16 nga oras. Iyang gipapas ang 59.77 nga nahimo ni Anthony Ong niadtong 2004.

Sa temporaryong medal tally, ang USC maoy nag-una sa secondary division nga mihakot og siyam ka golds ug duha ka bronze, samtang ang Dumaguete City High School mikolekta og duha ka golds ug ang UC ug Silliman University (SU) adunay tag-usa ka gold.

Sa elementary division, ang SU ug University of Southern Philippines Foundation (USPF) pulos mikabkab og tagduha ka bulawan.

Sa track oval, ang Cebu Institute of Technology maoy nag-una nga adunay duha ka golds, gisundan sa Talamban nga adunay duha ka golds, duha ka silvers ug usa ka bronze ug ang Basak Elementary School adunay 1-1-3 medal tally.

 (Yoyo R. Abayan)