CEBU, Philippines - Duha ka haligi sa Sta. Lucia Realtors nga sila si Dennis Espino ug Dennis Miranda ang moduwa sa laing koponan sa 35th season sa Philippine Basketball Association nga buksan karong Oktubre 11.
Ang beteranong si Espino moduwa na uban sa Coca-Cola Tigers bugti ni Jason Misolas ug duha ka second-round picks sa sunod tuig, samtang si Miranda magsul-ob na karon sa uniporme sa San Miguel Beermen sa sunod season.
Sila si Espino ug Miranda nahimong bililhon nga magduduwa alang sa Realtors nga milampos pagsakmit sa 2008 All-Filipino Cup title.
Si coach Boyet Fernandez sa Realtors niangkon nga lisud alang sa ilang koponan ang pagkawagtang nila ni Espino ug Miranda tungod kay mao kini ang naghatag og giya sa ilang mga batan-ong players.
Sa iyang bahin, si Kenneth Duremdes, kinsa sakop sa coaching staff sa Tigers, nagkanayon nga naghinam-hinam na sila sa pagduwa ni Espino alang sa ilang koponan nga nanginahanglan karon og usa ka beteranong forward human nawagtang si Nick Belasco, tua na niduwa sa Talk N’ Text Tropang Texters.
(Lemuel P. Maglinte)