Managkaribal mag-abot sa korte

CEBU, Philippines - Magtakus karon ang higpit nga karibal sa korte ang University of the Visayas (UV) Green Lancers ug ang Southwestern University (SWU) Cobras nga maoy sentro sa duwa sa collegiate division sa pagpadayon sa 9th Cebu Schools Athletic Foundation, Inc. (CESAFI) basketball event karong adlawa diha sa Cebu Coliseum.

Sa laing sangka sa collegiate division, suwayan sa Cebu Institute of Technology (CIT) Wildcats paglansang sa ilang ikaduhang kadaugan dihang ilang harungon ang wala pay daog nga Don Bosco Technology (DBTC) Greywolves.

Ang duwa karon importante kaayo alang sa 4-1 nga Lancers, apan tungason nga tahas ang iyang mahiaguman tungod kay dili makaduwa karong gabhiona ang 6-foot-11 nga si Gregory Slaughter, kinsa mosilbe sa iyang usa ka adlaw nga suspenso human makahimo og duha ka technical fouls atol sa ilang 79-65 nga kadaugan batok sa University of Southern Philippines-Foundation (USP-F) Panthers niadtong Septiyembre 1.

Bug-at alang sa Lancers pagpas-an sa ilang mga abaga nga dili makatabang si Slaughter karong gabhiona ug malingkod na lang sa ilang bench magsige og pakpak atol sa kulbahinam nga aksiyon.

Gumikan kay wala si Slaughter, hayan gamiton kining bentaha alang sa Cobras, apan dili sab kini garantiya nga yano silang modaog batok sa Lancers kay anaa man makatabang sa opensa sila si Edrian Lao, Mark Anthony Manigque ug Jerome Silva uban nilang Chris Victor Diputado, Harold Cincoflores ug Ritchum Dennison.

Aron ilang mapalagpot ang Lancers sa ikaduhang dapit sa overall standings, kinahanglan nga mowadwad og maayo sila si

Rene Pacquiao, Melvin Divinagracia ug Gilbert Gallarde ug ingon man sa mga beterano nga naglakip nila ni Arrd Diango, Eleazar Armecin ug Eliud Poligrates.

 Sa laing bahin, ang University of Cebu (UC) Junior Webmasters nagtinguha sa ilang ikaunom nga sunod-sunod nga daog sa dihang ilang harungon ang University of San Jose-Recoletos (USJ-R) Baby Jaguars, samtang ang Sacred Heart School-Jesuit (SHS-J) Eagles makiglabok sab batok sa Don Bosco Technology Center (DBTC) Greywolves. (BANAT NEWS)