CEBU, Philippines - Ang pambato sa Team Ervyn Racing nga si Erwin Albaracin maoy naghari sa expert division sa nagmalampusong 5th Underbone Rallycross series niadtong Domingo diha sa South Reclamation Properties (SRP) sa barangay Mambaling, ning siyudad.
Si Albaracin, kinsa nakabentaha nang daan sa unang duha ka laps sa lumba maoy gikoronahang bag-ong hari sa expert division human usab mapakyas si defending champion Gary Caneda pagtapos sa lumba human makasinati og daghang suliran.
Nagsunod ni Albaracin mao si Gong Iso sa Dumaguete City alang sa ikaduhang luna, samtang si Ayen Ledesma mitungtong sa ikatulo nga dapit.
Si Albaracin nakadawat og P5,000 ug usa ka semi-synthetic motor oil gikan sa PTT Lubricants sa maong kadaugan. Si Iso mibulsa og P2,500, samtang si Ledesma nakaangkon og P2,000.
Sa novice category, si Mark Larque sa Dipolog City ug si Ivan Iso sa Dumaguete City mao ang ni-okupar sa una ug ikaduhang puwesto, samtang si Albaracin napunta sa ikatulo.
Si Jeager Sienes saTeam PSR maoy migawas nga kampiyon sa beginners division, gisundan nila ni Eljhun Aldecoa ug Mendard Ladeza alang sa ikaduha ug ikatulo nga dapit.
Ang maong lumba gipasiugdahan sa PTT Lubricants Phils. ug sa Evvolve Marketing. (BANAT NEWS)