CEBU, Philippines - Magpuhalay na sab ang mga banggiitang riders dinhi sa Sugbu batok sa mga bisitang riders sa dihang ang 2009 MS Motosuit Motocross Series-Mayor Shun J. Shimura Cup mosikad karong adlawa diha sa Daanbantayan.
Dili momenos 60 ka daredevils ang gilaumang mopakita sa ilang talento batok sa usa'g-usa.
Gipasiugdahan ni Malou Pepito sa BJ Pepito Racing Team, ang 12th leg sa MS Motosuit Motocross Series gipaluyohan sab ni Mariquita Salimbangon-Yeung, Mayor Shimura, Vice Mayor Maria Luisa Loot, Municipal Council of Daan Bantayan ug Castrol Power One.
Gipaabot ang mga riders nga moladlad og maayo sa ilang abilidad dili lamang nga maghari niini nga leg, kun dili sa kinatibuk-ang lumba.
Ang mga riders gikan sa beginner's hangtod sa executive division makabaton og puntos sa matag leg. Ang mga puntos sumadahon human sa series diin ang makakuha og kinadak-ang puntos maoy ilhon nga overall champion sa ilang dibisyon ug may purohan nga mamahimong Rider of the Year.
Sa pagka karon, ang mga organizers wala pay gipagawas nga running scores human sa 11 legs, apan ang 2008 Rider of the Year nga si Seigfred Ornopia mao gihapon ang nag-una sa mga kandidato alang sa ROY award. Nagsunod ni Ornopia mao ang expert rider nga si Jon-Jon Adlawan.
Laing mga riders nga gilaumang mowadwad og maayo naglakip nila ni Donkey Sanchez, Wensor Famorca, Paulo Inoc, Gener Sicad, Ryan Quirol, John Flores, Jun Enriquez ug uban pa. (THE FREEMAN)