Stallions batok Niños sa Liga Cebu leg finals

CEBU, Philippines - Naka-eskapo ang Trace-Laguna Stallions bitbit ang 75-71 nga kadaugan batok sa GenSan-Pacman MP Warriors sa kulbahinam nilang duwa aron pag-abante sa finals sa Cebu leg sa 2009 Smart Liga Pilipinas Conference 3 kagabii diha sa Cebu Coliseum.

Sa maong kadaugan, ang Stallions ni coach Nomar Isla, nakaangkon og katungod sa pakigsangka sa M. Lhuillier Kwarta Padala-Cebu Niños ni Michel J. Lhuillier ug coach Raul 'Yayoy' Alcoseba alang sa kampiyonato karong gabii.

Grabe kaayo ang gipakitang labok sa duha ka kampo ug wala kini hunong nga nagsinukliay sa ilang mga puntos gikan sa pagsugod hangtod sa katapusang gutlo sa duwa, apan ang Stallions maoy mipatigbabaw ug mitukob sa daog. 

Ang Stallions ubos sa pagpangulo nila ni Alex Angeles ug Arvie Mangahas nakabaton og singko puntos nga bentaha sa unang kuwarter, 24-19. Giinat pa sa Stallions ang ilang labaw sa second period luyo sa kakugi ni Glen Bolocon, kinsa miposa og duha ka triples, napun-an pa og upat ka free throws ni Jay-R Estrada alang sa 43-32 nga pabor sa halftime. 

Apan ang Warriors ni Pinoy boxing champion Manny Pacquiao, mibawos sa third period aron laslasan ang labaw sa Stallions. Ang guwardiya nga si Jethrone Recustodio ug Dennis Concha mitira og tulo ka sunod-sunod nga triples aron pagsikit sa duwa, 51-50 sa katapusang 3:45 sa third period.

Gikan niadto, mainitong nagsinukliay sa ilang mga puntos ang duha ka kampo. Si Marlon Legaspi ug si Mangahas mipasulod sa ilang duha ka tres, apan gibawsan dayon kini sa Warriors.

Ang lay-up ni Don Mendoza sa nahabiling 1:14 sa duwa maoy nakapasikit og balik sa iskor sa Warriors, 71-72.

Makahigayon unta ang Warriors pagsakmit sa daog, apan mikagar ang jump-shot ni John Gonzaga ug ang nausik nga bola daling nakuha ni Khiel Misa nga nakapalagsik og balik sa Stallions.

Ang follow-up ni Gerwin Gaco gikan sa free-throw ni Misa maoy hingpit nga mikandado sa kadaugan sa Stallions.

Puntos Matag Usa

Laguna (75) – Gaco 13, Bolocon 10, Mangahas 9, Legaspi 7, Capati 6, Angeles 6, Misa 5, Doruelo 6, Villaver 5, Sanz 2, Ricafuente 2

GenSan (71) - Mendoza 13, Recustodio 12, Lianga 10, Sagad 10, Concha 10, Locsin 9, Gonzaga 8, Coronado 7, Farochillen 2. – BANAT NEWS