Teletech 6-0 na sa BPO caging

CEBU, Philippines - Walay hunong nga mipupo og daog ang Teletech Titans ug ang katapusang nilang biktima mao ang Western Wats, 78-68 aron pagposte og 6-0 nga baraha sa nagpadayong 5th Inter-BPO Basketball Championships diha sa City Sports Club-Cebu gym sa Cebu Business Park.

Ang Titans nabiyaan og uno punto sa unang 10 minutos sa duwa sa iskor nga 16-17, apan nakabawi sa second period aron pagtarok og tres puntos nga bentaha sa halftime, 37-34.

Si Erwin James Abellanosa maoy nangulo sa Titans nga miantog og 18 puntos, samtang sila si Laurenz Limpangog ug Earl Laurenz Sultan miabuno og 12 puntos matag usa.

Sa laing bahin, ang Convergys milubong sa Lexmark sa iskor nga 74-58 aron malansang sa unang dapit sa liderato sa bracket-B sa ilang walay lama nga rekord, 5-0.

Si Venerando de la Peña Jr. nagmangtas og maayo aron pangulohan ang Convergys nga mikutlo og 28 puntos.

Ang naparot nga Lexmark gipangulohan ni John Morin, kinsa mipupo sab og 28 puntos.

Sa lain pang duwa, ang 1 and 1 Internet Philippines nakatagamtam og daog batok sa Calltex Center sa iskor nga 57-48.

Si Allan Joel Andrino, kinsa mitusak og 16 puntos maoy nangulo sa 1 and 1 Internet Philippines. Ang managsuong Gellez nga sila si Mark Louise ug Jan Pierre nagkumboya og 32 puntos aron pangulohan ang pilderong Calltek Center.

Puntos Matag Usa

Unang duwa:

Convergys (74) - Dela Peña 28, Pajo 8, Esteban 7, Ngo 6, Sarmiento 6, Codilla 4, Contreras 4, Villarin 4, Tapic 3, Conson 2, Mabanto 2

Lexmark (58) - Morin 28, Bayot 8, Villahermosa 8, Lim 6, Torrepalma 4, Villaluz 4

Ikaduhang duwa:

Teletech (78) - Abellanosa 18, Limpangog 12, Sultan 12, Mata 10, Abordonado 7, Biaño 6, Cubero 4, Laboga 4, Martin 3, Medija 2

Western Wats (68) - Poquita 17, Alinson 11, Rivera 10, Tumakin 10, Silagan 6, Montecillo 5, Lago 4, Inot 3, Abadiano 2

Ikatulong duwa:

1&1 (57) - Andrino 16, Garcia 7, Guisadio 7, Ong 6, Santos 6, Amante 5, Perez 4, Tumagos 2, Vaflor 2, Wagas 2

Calltek (48) - M. Gellez 17, J. Gellez 15, Abellana 5, Fernandez 4, Paraguya 3, Florez 2, Gabuya 2. – BANAT NEWS