70 CEVRO referees mitambong sa tulo ka adlaw'ng seminar

CEBU, Philippines – Labing menos 70 ka referees nga sakop sa Central Visayas Basketball Referee Officials (CEVRO) ubos sa ilang presidente Ed Aguello ang mitambong sa tulo ka adlaw nga seminar nga gipasiugdahan sa Cebu Schools Athletic Foundation Inc. (CESAFI) diha sa Cebu Coliseum.

Ang seminar nga gisugdan niadtong miaging adlaw magsilbeng pangandam alang sa pagsugod sa 9th CESAFI season karong Agosto 1.

Ang beteranong international basketball referee nga si Romy Guevarra maoy resource speaker sa maong seminar.

Gihimo ang maong seminar aron masuta ni CESAFI commissioner Felix Tiukinhoy ang katakus sa referees kun angayan ba kining mo-officiate sa umaabot nga torneyo.

Lakip sa mosusi sa abilidad sa mga referees mao sila si Danny Duran ug Julian Macoy.

Si Guevarra, usa ka inila ug respetadong referee ug kanhi referee sa PBA sulod sa 13 ka tuig.

Karong adlawa, si Guevarra ug ang mga CEVRO referees makigtagbo sa mga CESAFI coaches.

Adunay duha ka duwa atol sa CESAFI opening day unya sa Agosto 1 diin ang Sacred Heart School-Jesuits Eagles moharong sa University of Southern Philippines Foundation (USPF) Baby Panthers sa juniors division, samtang ang University of San Carlos (USC) Warriors ug ang University of San Jose-Recoletos (USJ-R) Jaguars magtige alang sa collegiate division. – BANAT NEWS