UC Webmasters vs. SWU Cobras

CEBU, Philippines – Labing menos pito ka mga rookies sa University of Cebu (UC) Webmasters lakip na ang duha ka Fil-Canadians ang moduwa sa ilang pag-host batok sa CESAFI-Partner’s Cup champion Southwestern University (SWU) Cobras karong gabii sa usa ka exhibition game nga ulohan og "Match of the Titans" diha sa Cebu Coliseum.

Alang ni coach Roel Gomez, ang Fil-Canadians nga sila si Keith Cayanong ug Franz Bernil mopalig-on sa    backcourt sa Webmasters sa umaabot nga 9th season sa Cebu Schools Athletic Foundation, Inc. nga sugdan sunod bulan.
 Ang goodwill match karong gabii tali sa Webmasters ug Cobras, usa ka fund-raising project alang sa UC College of Law alang sa ilang libreng legal aid ug sa ilang bar operations karong umaabot Septiyembre didto sa Manila.

Ang UC College of Law nakamugna og duha ka bar topnotchers nga si Atty. Baldomero C. Estenzo, kinsa usa sab ka basketbolista dihang nagtungha pa siya sa kolehiyo ug si Kenneth Kern Sesante.

Si Sesante, kanhi team captain sa Webmasters ug mao karon ang presidente sa UC Law Students Society (UCLASS) maoy mangulo sa UC College of Law batok sa SWU College of Law alang sa preliminary game.
Si Sesante maoy second placer sa Customs Brokerage Licensure Examinations tulo na ka tuig ang milabay.
Ang UC College of Law ug ang SWU College of Law parehong mipakita sa ilang abilidad sa 4th Association of Law Students of the Philippines-Integrated Bar of the Philippines (ASLP-IBP) tournament.
Gawas nilang Cayanong ug Bernil, ang laing mga rookies sa UC ning tuiga naglakip nilang 6-foot-3 Mark Tano nga gikan sa Zamboanga del Norte, Pompeyo Miranda III, kanhi high school standout Reynan Capoy, kinsa sakop sa UC juniors champion team duha na ka tuig ang milabay, Daniel Enriquez ug Kirby Hans Cabrera.
Sama sa naandan, ang Webmasters palig-onan gihapon sa ilang 6-foot-9 June Mar Fajardo. 
Ang Cobras ni coach Dodie Miego bitoonan nilang Alfred Belande, Rene Pacquiao, Elud Poligrates, Janno Nuñez, Eleazar Armecin, Clifford Maguate ug Gilbert Gallarde. – BANAT NEWS