Martus Jr. nagpanikad

CEBU, Philippines – Masaligon ang Sugbuanong si Teodoro Martus Jr. nga iyang maangkon ang kampiyonato sa Baguio Centennial International Word Builders Tournament karong Septiyembre 17-20 didto sa Baguio Country Club.

Ang maong kalihukan usa ka open competition ug 140 lang ka mga scrabble players gikan sa nagkalain-laing nasud sa tibuok kalibotan ang dawaton.

Matud pa ni Martus nga naghinam-hinam na siya nga makigtigi sa mga dekalibreng scrabble players gikan sa laing nasud ug iyang paningkamutan nga modaog aron mahatagan og dungog ang nasud sa natad sa scrabble.

Ang kampiyon mobulsa og P200,000, ang second placer makadawat og P50,000, ang third placer makaangkon og P30,000.

Ang fourth ug ang fifth placers modawat og P20,000 ug P10,000 matag usa kanila.

Ang upat ka adlaw nga torneyo mosubay og Gibson rule diin ang magduduwa nga makatigom og daghang daog maoy moabante sa finals. – BANAT NEWS