Sto. Niño, La Familia Beach nagpanikad

CEBU, Philippines – Naghinam-hinam na ang   La Familia Beach Resort ug Sto. Niño Cagers sa ilang sangka alang sa korona sa 2nd Casiano Gerona Cup karong Domingo didto sa Tabuelan Sports Complex.

Sa dili pa ang ilang sangka sa alas-9 sa gabii, magsangka pa ang Dodong Lance nga gipangulohan ni kanhi University of the Visayas (UV) Green Lancers Ronald Bucao batok sa ABC sa alas-7:30 gabii.

Sila si Marlon Basco ug Alex Cainglet nga pulos sakop sa Cebu Landmasters, kinsa misakmit sa Friendship Cup championship dili pa dugay mao ang motimon sa Sto. Niño.

Sa laing bahin, ang Movie Stars Lakers nga gilangkuban sa mga sikat nga aktor sama nilang Cesar Montano ug Philip Salvador mopakita sa ilang abilidad sa natad sa basketbol batok sa Tabuelan LGU Magic ni Gilbert Demape karong Sabado didto gihapon sa Tabuelan Sports Complex.

Ang maong liga nga gimugna agi'g halad sa nagsingabot nga kapistahan sa ilang mahal nga patron San Juan Bautista karong Hunyo 21-22, gipaluyohan ni Vice Mayor Rex Gerona, kinsa mao usab ang chairman sa sports committee sa lungsod sa Tabuelan uban sa abag nilang Arli Perez ug Moises Trazos, isip committees. – BANAT NEWS