Batch '84 daog sa Batch '96

CEBU, Philippines – Mikulit na sab og daog ang Argentum-Batch '84 ni team manager Elmer Hamis human ilang gipukan ang Batch '96, 75-66 sa USJ-R High School Alumni basketball tournament didto sa USJ-R Basak campus gym.

Ang Batch '96 unang miarangkada ug miposte og 10 puntos nga labaw, 22-12 ug ilang gitapos ang first half sa iskor nga 36-29 pinaagi sa pakigtambayayong nilang Richard Arco, Jordan Rosito ug Arthur John Arco.

Hinuon, ang Batch '84 milusad og kaugalingong rally sa third quarter aron masakmit ang labaw, 55-45 paingon na ngadto sa fourth period.

Sila si Rey Gurrea ug Rocky Bacalso nagkumboya og 39 puntos aron hatagan ang Batch '84 sa ilang ikaduhang daog. Si Gurrea mipupo og 21 puntos, samtang si Bacalso miani og 18 puntos.

Si Richard Arco mao lang ang bugtong player sa Batch '96 nga mikulit og double figures pinaagi sa iyang 26 puntos.

Ang torneyo kabahin sa umaabot nga USJ-R High School Grand Homecoming karong Hulyo 18-19.

Puntos Matag Usa

Batch ’84 (75) - Gurrea 21, Bacalso 18, Salili 13, Patalinghug 10, Maranga 5, Galope 4, Martelino 2, Gajudo 2

Batch ’96 (66) - R. Arco 26, Rosito 8, AJ Arco 8, Abarquez 8, Rago 5, Toledo 5, Rama 2, Belandres 2, Chase 2 – BANAT NEWS