Banilad, Paknaan mag-ilog sa titulo

CEBU, Philippines – Mag-abot ang dalan sa duha ka dekalibreng koponan sa tinaktakay nga kampiyonato sa 2nd Mandaue City Fiesta Mayor's Cup basketball tournament karong gabii diha sa Mandaue City Sports and Cultural Complex.

Ang barangay Banilad ni Brgy. Capt. Glen Bercede ug ang barangay Paknaan ni Brgy. Capt. Oscar Mendoza magpinaksitay alang sa open division title.

Sa dili pa ang kulbahinam nilang engkuwentro, magsangka una ang barangay Paknaan ug barangay Tabok alang sa korona sa senior division nga gikatakda sa alas-7 sa gabii.

Mangulo sa barangay Banilad mao ang higanteng si Junmar Fajardo sa University of Cebu (UC) Webmasters, uban nilang James Relampagos, Jett Latonio, Franklin Nailon, Anton Viloria ug Moncrief Rogado.

Ang barangay Paknaan pangulohan sab ni Mark 'The Spark' Ababon sa M. Lhuillier Kwarta Padala-Cebu Niños. Maghangad sab kini sa suporta nilang Ronald Bucao, Ritchum Dennison, Alfred Belande, James Laygo, Al Caputolan ug Eric Zanoria.

Sa sayo pa, ang barangay Tabok maoy milangkat sa titulo sa midget division, samtang ang barangay Paknaan nidaog batok sa barangay Maguikay aron paghari sa 21-under category. – BANAT NEWS