CEBU, Philippines - Kapin sa 100 ka mga bata, kinsa misalmot sa 13 ka adlaw nga Alaska Power Camp basketball clinic nga gisugdan niadtong Mayo 14, ang modawat sa ilang certificates of attendance sa closing ceremony karong adlawa diha sa Don Bosco Technology Center (DBTC) covered courts sa barangay Punta Princesa, ning siyudad.
Motunol sa mga sertipiko mao mismo si Alaska Aces team manager Joaquin Trillo ug si Alaska Milk Corporation (AMC) vice-president for Marketing Blen M. Fernando.
Ang camp director nga si Roel Gomez, kinsa mao sab ang coach sa University of Cebu (UC) Webmasters nagkanayon nga iya sab nga gidapit sa pagtambong si Aces head coach Tim Cone, apan nagduha-duha pa ang naulahi.
Matud pa ni Gomez nga ang pagpanghatag sa mga sertipiko himuon alas-10 sa buntag ug isunod dayon ang pagpahigayon sa five-on-five game alang sa tanang players aron masuta kun aduna ba sila’y nakutlo nga pagtulon-an sa ilang pagsalmot sa maong clinic.
Nisalmot sa maong clinic mao ang mga bata nga nagpangedaron gikan 6-hangtod sa 16-anyos. Lain-laing training modules nga gigamit matag level kay dili makasustenir ang mga bata sa mas lisud nga training.
Miabag ni Gomez sa training mao si UC Junior Webmasters coach Reggie Licanda, Caleb Gawangon, Jover Samonte, Allain Abellanosa, Kelvin Juliane ug Lawrence Agas.
Matud pa ni Gomez, ang AMC naglaraw'ng mopahigayon og clinic sa Tagbilaran, Dumaguete, Bacolod ug ubang mga dakbayan sa Mindanao. - Gabby G. Malagar (BANAT NEWS)