1st Fastball softball tournament padayonon karong adlawa

CEBU, Philippines – Pagsakmit sa championship trophy maoy damgo sa Halbstarken sa aksiyon sa 1st Fastball Softball Tournament nga padayonon karong adlaw diha sa Aboitiz Sports Field duol sa North bus terminal sa dakbayan sa Mandaue.

Ang Halbstarken awtomatik nga nakakuha'g luna sa semifinals human giharos ang lima nila ka duwa sa elimination round.

Ang double-header niadtong miaging semana wala makahatag og problema sa Halbstarken kay yano kaayo nilang gipukan ang ilang kaatbang.

Gilubong sa Halbstarken ang Fastball Blue Panthers, 8-3, sa wala pa buntoga ang Knights, 13-5.

Nagsunod sa Halbstarken sa overall standings mao ang International Phillies nga adunay 4-1 nga baraha.

Giharos sab sa Phillies ang ilang katapusang duha ka duwa sa classification round. Ilang gilubong ang Fastball Blue Angels, 11-1, una nila mahipos ang 8-6

nga kadaugan batok sa Fastball Blue Panthers.

Ang team Korea maoy nahimutang sa ikatulo sa standings nga adunay 3-2 win-loss record, gisundan sa Fastball Blue Angels sa ilang 2-3 nga baraha nga igo kaayo alang kanila aron moabante sa semifinals.

Hinuon, dakung kalbaryo ang atubangon sa Fastball Blue Angels kay ang no. 1 nga Halbstarken mao man ang ilang ikabagat sa crossover semis.

Ang team Korea mitapos sa ilang kampanya sa eliminasyon pinaagi sa pagpukan sa Knights, 22-12 ug sa Fastball Blue Angels, 12-4. – BANAT NEWS