M. Lhuillier caging duwaon sa Labangon ug sa Talamban

CEBU, Philippines – Tinguha sa CSD Power Brokers nga mahayagan ang ilang dalan alang sa semifinals sa dihang ilang sangkaon ang Salazar Colleges of Science and Institute of Technology (SCSIT) Skyblazers sa unang duwa nga gikatakda sa alas-7 sa gabii sa dili pa magsangka ang Binglens ug Asian College of Technology (ACT) Cyber Knights sa alas-8:30 sa gabii diha sa Labangon Sports Complex.

Ang CSD Power Brokers makabentaha sa duwa batok sa SCSIT kay anaa man sa ilang pader ang mga beterano sa komersiyal nga liga sama nilang Aldrin Ocañada, Franklin Nailon ug Jerry Jaca.

Mao sab ang Binglens, kinsa mikuha sab sa serbisyo sa ex-pro nga si Max Delantes ug bull-strong forward Jessie Lumantas.

Ugma, ang aksiyon dad-on ngadto sa Talamban Sports Complex, diin ang Ave Maria Sanctuary Park/USJ-R Jaguars naglaraw nga motukob sa ilang ikaunom nga sunod-sunod nga kadaugan dihang   ilang hamagon ang ACT Cyber Knights sa main game nga gikatakda sa alas-8:30 sa gabii.

Sa pasiunang duwa nga gikatakda sa alas-7:30 sa gabii, ang Perfect Freight makigsangka batok sa 24/7 Convenience Store nga gipangulohan ni Mark Abadia.

Gitukod sa M. Lhuillier pinaagi sa ilang marketing representantives Mike Roma, ang makampiyon sa torneyo mobulsa og P50,000, ang second placer makadawat og P30,000 ug ang third placer makaangkon og P15,000. – BANAT NEWS