Abellar nangmangtas sa Congressman Cajes moto-x

CEBU, Philippines – Mikulit og double victory si Jubenile Abellar sa 2009 Congressman Cajes Invitational Motocross didto sa Trinidad, Bohol.

Ang pambato sa Power Sports Racing/Moto-Fix/PTT Lubricants nga si Abellar naghari sa expert open batok ni Irwin Uypitching, kinsa nahimutang sa ikaduha. Si Winsor Pamorca maoy mipahiluna sa ikatulo.  

Gidominar sab ni Abellar ang intermediate class batok gihapon ni Uypitching, samtang si Paolo Inoc mipahiluna sa third place.

Sa novice production, si Jasper Davis mao ang mipatigbabaw , gisundan ni Michael Desbaro ug Adam Uypitching nga mi-okupar sa ikaduha ug ikatulo nga dapit.

Hinuon, si Desbaro nakabawi dihang iyang gilupig si Reynaldo Ytac aron maghari sa novice production class, samtang si Dario Labor nalandig sa ikatulo.

Sama ni Desbaro, si Ytac nakabitbit sab og titulo dihang iyang gidominar ang all-Bohol showdown. Gisundan nilang   Labor ug Mark Lajot nga mipahiluna sa ikaduha ug ikatulo nga dapit.

Sa iyang bahin, si Ian Adlawan Reyes maoy nigawas nga kampiyon sa freestyle competition human niya mapuhali si Jovanni Abellar, ang igsuon ni Jubenile. – BANAT NEWS