CEBU, Philippines – Banatan karong adlawa ang 8th leg sa 2009 MS Motosuit Motocross Series nga ulohan og "7th Mayor Mariano Martinez Motocross Cup" didto sa San Remigio sa amihanang bahin sa lalawigan sa Sugbu.
Ang kasamtangang lider karon sa karera ug MS Motosuit image model nga si Jonjon Adlawan maoy mangulo sa lumba uban sa iyang teammates nga sila si Juvenille Abellar ug Jovanni Abellar.
Si Adlawan sa PSR racing team nikulit og sunod-sunod nga kadaugan human manghawod sa 6th leg didto sa Pinamungajan ug sa 7th leg didto sa Ayungon, Negros Oriental.
Laing MS Motosuit image model nga si John Flores sa Joy Flores racing team mopakita sab og aksiyon sa San Remigio.
Ang 2008 Rider of the Year nga si Seigfred Ornopia sa Keiz BJ racing team manalipod sab sa iyang titulo sa Executive-A.
Mopakita sab sa ilang abilidad ang tulo ka anak ni Ornopia nga sila si Earl Jean Brylle, Ken Keizer ug Kerry Keizer. Si Brylle moratsada ubos sa mini class, samtang sila si Ken ug Kerry sa peewee division.
Ang Keiz BJ racing team moparada sab sa ilang banggiitang riders nga sila si Gener ug Titing Sicad, Dondon Famador ug Dr. Felipe Montejo.
Ang NR racing team nga gipanag-iya ni Nonoy Reluya sa San Fernando, Cebu mopakita sab og aksiyon uban usab sa ilang top riders nga sila si Ambo ug Weng Yapparcon ug Rex Barbaso.
Mosalmot sab ang BJ Pepito racing team sa Daan Bantayan nga gipangulohan ni Malou Pepito uban sa iyang anak nga si BJ Pepito, ang umaabot nga mini class rider.
Ang 8th leg sa MS Motocross Series gipasiugdahan sa Municipality of San Remigio pinaagi sa mga paningkamot ni Mayor Mariano Martinez, Vice Mayor Nino Bascon.
Gipaluyohan sab kini sa Castrol Power 1, Cebu Reliance Motor Parts, MS Digital Prints, Keiz BJ Motorsales, F&FO Motor Parts, RMO Motor Parts, MS Carsuits sa kooperasyon sa MS Motosuit Motocross TV ug Kier Louie's Motosuit Manufacturing. – BANAT NEWS