Siso batok Siso sa under-18 Gullas Cup finals

CEBU, Philippines – Mag-unay na sab ang managsuong Siso nga sila si Sallymae ug Sallydine human makakuha og lingkoranan sa finals sa girls' under-18 category sa 2009 Gullas Cup Age-Group Tennis Tournament diha sa Cebu Country Club.

Nakuha ni Sallymae ang unang lingkoranan sa finals human sa iyang yano nga kadaugan batok ni Cindy Gerapusco, 6-3, 6-0 sa semifinals kagahapon. Samtang si Sallydine miangkon sa katapusang lingkoranan pinaagi sab sa 6-3, 6-0 nga kadaugan batok ni Ann Bienes.

Sila si Sallymae ug Sallydine mag-abot karon sa ilang ikalimang engkuwentro sulod lang niining tuiga.

Si Sallydine adunay 3-1 batok sa iyang manghod nga si Sallymae, apan ang naulahi kuyaw ug dili angay'ng kompiyansaan.

Naglaraw karon si Sallymae og dobleng kadaugan kay moduwa man sab siya sa kampiyonato sa under-16 division human niya gisirohan si Niña Ladera sa Zamboanga City, 6-0, 6-0 sa semifinals.

Iyang sangkaon si Cindy Geraspusco, kinsa iyang gipilde kagahapon sa semifinals sa under-16 division.

Sa laing bahin, si Niño Siso nangahas sab paghakot og duha ka titulo human misulod sa semifinals sa boys' under-16 ug under-18 divisions.

Sa U16 semifinals, si Niño moharong ni John Arnel Go, samtang si Christian Paul Cabahug makigsambunot ni Franklin Encarnacion.

Si Niño makigbatok ni Anthony Espinosa sa unang semifinals sa U18 division, samtang si Joel dela Torre mag-abot sa modaog sa quarterfinals tali nilang Franklin Encarnacion ug Lloyd Cañete alang sa sunod niya nga kontra.

Sa laing girls' finals, si Espinosa moharong ni Crissianne Kintanar alang sa U14 title, samtang si Alexie Santos ug Kintanar magtigi alang sa U12 title.

Sa boy's division, si Kurt Geraspusco nakaangkon og lingkoranan sa finals human sa iyang 6-2, 6-0 nga kadaugan batok ni Alexis Ondoy sa semis. – BANAT NEWS