Arcilla-Tierro tandem naghari

CEBU, Philippines – Nabalda sa pagbunok sa dakung ulan ang duwa sa men's double finals niadtong Sabado, apan wala kini makapabugnaw sa kainit sa duwa sa tandem nilang Johnny Arcilla ug Patrick John Tierro.

Ang managkaribal sa singles event nga sila si Arcilla ug Tierro naghugpong alang sa finals showdown batok sa paresan nilang Elbert Anasta ug Jaime Solon aron langkaton ang korona sa Cebuana Lhuillier Tennis Circuit Men's Open didto sa Baseline Tennis Center, ning siyudad.

Gitapos nila ni Arcilla ug Tierro ang duwa, 7-6, 6-3 aron pagbulsa sa P20,000. Sila si Arcilla ug Tierro gitunolan sab og nindot kaayong lamina (plate) gikan ni tennis sports patron ug businessman Jean Henri Lhuillier, kinsa giabagan sa iyang ginikanan, Ambassador to Italy nga si Philippe ug Edna Lhuillier.

Atol sa awarding ceremonies, si Edna Lhuillier mipahibalo nga ang sunod nga leg himuon karong Disyembre didto sa iyang yutang natawhan sa Dumaguete City. – BANAT  NEWS