CEBU, Philippines – Mihabwa og laing daog ang CSD Power Brokers ni Romy Cal batok sa Binglens, 66-61 sa nagkainit nga aksiyon sa 1st M. Lhuillier Kwarta Padala Cup basketball tournament didto sa Naga Sports Complex.
Sa maong kadaugan, ang CSD Power Brokers nakigsawo sa ikatulo nga dapit sa overall standings uban sa Chazyl Mae, San Remigio Beach Club ug Binglens sa managsamang 3-2 win-loss records. Ang Ave Maria Sanctuary Park mao na lang ang bugtong koponan nga wala pa makatilaw og pilde nga adunay 4-0 nga baraha, samtang ang Asian College of Technology (ACT) Cyber Knights nag-solo sa ikaduhang dapit sa ilang 3-1 nga baraha.
Ang CSD Power Brokers nabiyaan lang og uno punto paghuman sa ikatulong kuwarter sa iskor nga 47-48, apan ilang naapsan ang Binglens sa nanghinapos nga bahin sa duwa aron pagsakmit sa daog.
Sila si Aldrin Ocañada ug Jerry Jaca maoy topscorers sa CSD Power Brokers nga mikimada og 18 puntos matag usa, samtang sila si Jessie Lumantas ug Alain Abellanosa mao sab ang nangulo sa pilderong Binglens nga parehong mipupo og 10 puntos.
Sa laing aksiyon, ang Salazar Institute of Technology (SIT) Skyblazers ni coach Jojo Romarate nakatilaw na gyud og daog human gipukan ang Perfect Freight sa iskor nga 82-75.
Ang makampiyon sa maong torneyo nga gipasiugdahan sa M. Lhuillier pinaagi sa ilang marketing director Michael Roma makaangkon og P50,000, ang second placer makadawat og P30,000, ang third placer makabulsa og P15,000 ug ang fourth placer makadawat og consolation prize nga P5,000.
Puntos Matag Usa
Unang duwa:
SCSIT (82) - De la Vega 26, Cabrera 16, Mansueto 13, Rabaya 8, Napolitano 6, Amagrado 6, Gabica 3, Tampus 2, Aribal 2
Perfect Freight (75) - Cantonao 19, Filoteo 14, Panerio 14, Escudero 12, Canoy 6, Miro 4, Madolin 4, Montajes 2
Ikaduhang duwa:
CSD (66) - Ocañada 18, Jaca 18, De los Santos 9, Abobo 6, Abatayo 6, Nailon 5, Redulosa 4
Binglens (61) - Lumantas 10, Abellanosa 10, Canceran 9, Abelong 9, Almonte 5, Mercado 4, Galinato 4, Delantes 3, De la Victoria 3, Garcia 2, Dagatan 2 – BANAT NEWS