PRISAA National Games Navaja giilang best trackster

CEBU, Philippines – Nakaangkon og dakung dungog ang Sugbuanong si Lindley Fran Navaja dihang giila siya isip kinakusgan nga atleta sa 2009 Private Schools Athletic Association (PRISAA) National Games didto sa Naga City.

Gipamatud-an ni Navaja nga angay siyang ilhon nga best trackster sa miaging tuig nga Palarong Pambansa didto sa Palawan human mikabkab og bulawan sa century dash, iyang unang aksiyon sa PRISAA. Si Navaja mi-oras og 10.79 segundos sa maong event.

Ang iyang teammate nga si Anthony Santillan mi-okupar sa ikatulo nga dapit pinaagi sa iyang 11.08 segundos.

Si Navaja mao sab ang nangulo sa Central Visayas pagkubkob og bulawan sa 4x100m relay uban nilang Santillan, Dharl Pitogo ug Jorge Pinanong.

Si Love Joy Intong mihakot og bronze sa women's division sa oras nga 12.98 segundos.

Laing duha ka tracksters nga sila si Angelica Lado ug Joy Tabal ang mitunol og medalya matag usa alang sa PRISAA-7.

Si Lado midaog og silver medal sa discus throw sa distansiya nga 26.57 metros, samtang si Tabal mitiltil og bronze sa women's 400m run.

Sa swimming, si Menguito padayong miutong alang sa iyang ikaduhang bulawan pinaagi sa 100m butterfly event. Nidaog sab siya og silver sa 100m freestyle.

Si Rowan Fernandez mihakot sab og bronze sa 1,500 freestyle competition.

Sa kinatibuk-an, ang PRISAA-7 kasamtangang mihipos og upat ka golds, upat ka silvers ug lima ka bronzes sa unofficial medal tally kagahapon. – BANAT NEWS