CEBU, Philippines - Molarga na paingon sa Butuan City ang nag-unang tulo ka teams dinhi sa Sugbu alang sa tinuig nga National Students Basketball Championship (NSBC) nga gikatakda karong Abril 20-26 didto sa Urios College gym diin didto mag-abot ang tanang regional champions aron magtigi sa korona.
Ang tulo nga nagtinguhang molangkat sa korona mao ang defending champion Southwestern University (SWU) Cobras, University of Cebu (UC) Webmasters ug ang University of San Jose-Recoletos (USJ-R) Jaguars, kinsa mitapak sa lugar sa runner-up University of the Visayas (UV) Green Lancers, kinsa mi-atras sa ilang partisipasyon kay kulang kini'g mga players.
Gumikan niini, ang Cobras adunay daku'g kahigayonan nga madepensahan ang ilang korona tungod sa pagsibog sa Green Lancers.
Matud pa ni Basketball Association of the Philippines (BAP) regional director Lorenzo 'Chao' Sy, nga ang paglarga sa SWU, UC ug USJ-R ngadto sa Butuan gihatagan na og permiso ni Cebu Schools Athletic Foundation, Inc. (CESAFI) president Engr. Rolando Villa sa University of Southern Philippines Foundation (USPF).
Si Sy molarga sa sunod adlaw aron motambong sa regional director's meeting nga pangulohan ni BAP president Prospero 'Butch' Pichay ug BAP secretary-general Graham Lim. (BANAT NEWS)