Lima ka Sugbuanong netters abante sa semis

CEBU, Philippines – Lab-as pa gikan sa ilang mabungahong kampanya didto sa Dumaguete, ang mga masaarong Cebuano netters gikan sa SANCASE Developmental Training Pool ni Fr. Rey Talaugon mipakita na sab ilang katakus dihang lima sa ilang kaubanan ang miabante sa semifinal round sa Bacolod City leg sa Head Penn Age-Group Tennis Circuit didto sa Noah’s Haven Tennis Club sa Homesite Montevista. 

Sa gihapon, ang managsuong Niño ug Sallydine Siso maoy nangulo sa mga Sugbuanon uban nilang Cheska Tabotabo, Mac-Mac Chan ug Fritz Satera.

Gipukan ni Niño si Jay-R Dominguez, 10-2 aron pag-angkon og luna sa semifinals sa boys 18-under, samtang ang iyang igsuon nga si Sallydine miposte og 10-7 batok ni Shannen Mae Sombito aron sab pag-abante sa semis.

Si Tabotabo pabiling buhi sa iyang tinguha nga titulo sa girls 16-under human mirehistro og 10-4 batok ni Frances Maris, samtang sila si Satera ug Chan miabante sab sa semis sa boys 14-under. 

Si Satera nimasaker ni Ralf Sevilla, 10-1, samtang gisirohan ni Chan ang kaatbang niining si Jhon Vincent Lim, 10-0.

Sa laing bahin, ang ilang kauban nga si Cyril Camporedondo, miyukbo ngadto ni RK Abarquez, 4-10 sa boys 18 category. –BANAT NEWS