CEBU, Philippines - Human sa init nga kumbati sa semifinals round, andam na ang tanan alang sa Game One sa finals tali sa top seeded Misamis Oriental Meteors ug defending National Champion M. Lhuillier Kwarta Padala –Cebu Niños sa best-of-five finals series sa 2009 Smart Liga Pilipinas Conference II National Finals ugmang adlawa didto sa Xavier University Gym, Cagayan De Oro City.
Dili kini ang unang higayun nga mag-abot ang duha sa mga banggiitang commercial teams dinhi sa nasud, unang nagkasangka ang duha sa Mindanao Visayas Basketball Association (MVBA) Finals niadtong tuig 2006 ug 2007 diin gipukan sa Jewelers ni Michel Lhuillier ug coach Raul “Yayoy” Alcoseba ang Meteors ni Gov. Oscar Moreno.
Nanganti usab ang coach sa Misamis Oriental nga si Jun Noel ang usa ka panimalos human sila gipilde sa Niños sa makaduha ka higayun sulod sa tulo ka duwa. Unang gipakuratan sa Cebu ang Mis.Or niadtong Marso 5, 70-65, ug nausban kini atol sa Mis. Or Leg preliminaries, 61-58.
Bugtong duwa nga nidaog ang Meteors batok sa Niños atol sa Cebu City Leg preliminaries niadtong Marso 7 sa iskor nga 69-68.
Sa miaging conference, gilatus sa Niños ang Meteors sa makaduha ka higayun atol sa Pagadian Leg, 84-72 ug 86-70. Atol sa playoffs, napilde ang Meteors sa Harbour Centre-Taguig Batang Global sa semifinals, 3-1, samtang ang Niños nilumpag sa Taguig aron sakmiton ang labing unang Liga championship niadtong Septiyembre, 3-0.
Niining higayuna, paninguhaon sa Meteors nga masakmit na ang kampiyonato. Ang Meteors nakalingkawas sa Quezon Red Oilers niadtong miaging Huwebes Santo, 58-57 aron moabante sa finals. - BANAT NEWS