Roble Shipping, 5-0 na sa Friendship Cup 2009

CEBU, Philippines - Mikulit sa ilang ikalimang sunod-sunod nga daog ang Roble Shipping ni team manager George Uy human ilang gipukan ang wala pay daog nga Vic Enterprises, 122-110 sa nagpadayong Sunriser/Powerball Friendship Cup 2009 didto sa CEC gym.

Human sa panagtabla, 24-all sa first quarter, ang Roble Shipping kalit lang nga miarangkada ug ilang gitapos ang first half pinaagi sa pagposte og otso puntos nga bentaha, 58-50 sa halftime kortesiya nilang John Carpio ug Jingjing Rama.

Uban sa ilang higanteng si Jessie Gabatan, ang Roble Shipping milansang og double figures nga labaw pag-entra sa final period, 82-72.

Si Rama nagmangtas ug mikulit kini og 32 puntos, samtang si Gabatan mihakot og 20 puntos nga maoy labing taas niyang produksiyon gikan sa pagsugod sa torneyo. Si Charlie Abellon miamot og 18 puntos ug Carpio mitampo og 16 puntos.

Sila si Teyoy Lim, Sammy Sia ug Tirso Aberia mihipos sab og double figures alang sa kadaugan sa Roble Shipping.

Si Boy Maranga maoy nangulo sa Vic Enterprises pinaagi sa pagposte og career-high 43 puntos.

 Sa sayo pa, ang Unilink Shipping nga gipangulohan ni Cromwel Kwan nimasaker sa Powerball sa iskor nga 111-84 aron pagpuwesto sa ikaduhang dapit sa ilang 4-1 win-loss record.

Si Alwin Tabasa maoy topscorer sa Unilink sa iyang 27 puntos, samtang ang skipper nga si Paul Quiñanola mibugha og 20 puntos lakip na ang lima ka triples.

Ang Powerball gipangulohan ni Lando Luces sa iyang 20 puntos.

Puntos Matag Usa

Unang duwa:

Unilink (111) - Tabasa 27, Quiñanola 20, Navarro 16, Bacaly 12, Seno 10, Petallar 6, Gerali 6, Garcia 6, Kwan 5, Adarna 3

Powerball (84) - Luces 20, Carhuana 17, Estorba 17, Fuentes 15, Cuetara 8, Seno 7

Ikaduhang duwa:

Roble Shipping (122) - Rama 34, Gabatan 20, Abellon 18, Carpio 16, Lim 12, Sia 10, Aberia 10, Maquilan 4

Vic Enterprises (110) - Maranga 43, Ho 28, Uy 17, D. Maranga 12, Budiongan 10. – BANAT NEWS