3-0 tuyo sa CSD Power Brokers

CEBU, Philippines - Laraw sa CSD Power Brokers nga moposte sa ilang ikatulong sunod-sunod nga daog sa dihang ilang banggaon ang Perfect Freight karong gabii sa pagpadayon sa 1st M. Lhuillier Kwarta Padala Cup basketball tournament diha sa Minglanilla Sports Complex.

Gibitoonan sa mga commercial players, ang CSD Power Brokers makigsangka sa Perfect Freight sa unang duwa nga gikatakda sa alas-7 sa gabii sa dili pa ang kulbahinam nga duwa tali sa Ave Maria Sanctuary Park ug sa 24/7 Convenience Store sa alas-8:30 sa gabii.

Ang CSD Power Brokers nagbitbit karon og 2-0 nga baraha, samtang ang Perfect Freight nagpabiling walay daog sa duha ka duwa.

Gipaabot nga mopabuhagay sa ilang opensa sila si Aldrin Ocañada, Jan Montalbo, Ken Abatayo ug Frank Nailon.

Gitukod sa M. Lhuillier Kwarta Padala pinaagi sa ilang marketing manager Mike Roma, ang torneyo mosubay og single round robin format diin ang top four teams moabante sa crossover semifinals. Ang mga mananaog maoy magbagat sa kampiyonato.

Ang makampiyon makaangkon og P50,000, ang second placer makadawat og P30,000 ug ang third placer mobulsa og P15,000. – BANAT NEWS