Autocross Series mo-arangkada karon

CEBU, Philippines - Moarangkada karon ang second round sa Philippine Autocross Championship Series nga gipaluyohan sa Castrol Edge diha sa luyo nga bahin sa Cebu International Convention Center (CICC) sa Mandaue reclamation area.

Ang duha ka adlaw nga kompetisyon sugdan sa practice session gikan sa alas-8 sa buntag hangtod sa alas-5 sa hapon aron ang mga partisipanteng riders makasinati sa race course. Sa Sabado himuon mao na ang race proper.

“For several years now, it has been Castrol’s commitment to support all motorsports events. It is through this endeavor that we can show that we can be partner with motorsports enthuasiasts while at the same time promoting our product,” matud pa ni Mark Laus sa Castrol sa press conference kagahapon didto sa Baseline Restaurant.

Mitambong sab sa kalihukan mao si Neil Labrador sa Peak Summit Group ug Jong Uy sa The Racing Line.

Ang lumba maoy ikaduha sa lima ka leg series. Ang matag round, ang driver hatagan og puntos depende sa iyang performance. Ang kampiyon makadawat og 10 puntos, ang second placer hatagan og otso puntos, ang third placer hatagan og sayes puntos, samtang ang fourth ngadto sa eight placers makaangkon og 5, 4, 3, 2 ug 1 puntos.

Ang riders nga makatigom og labing daku nga puntos inig human sa series maoy ituboy nga “Cebu Driver of the Year.”

Ang modaog moharong sa best drivers gikan sa nagkalain-laing bahin sa nasud atol unya sa National Championship karong Disyembre didto sa kaulohan.

Sa gihapon, adunay 15 ka kategoriya ang tigian sa maong lumba. Kini naglakip sa Stock A, B ug C, Modified A, B ug C, Open B ug C. Ang drivers gibuwag ngadto sa novice ug experienced. Aduna say special classes alang sa tanang BMWs, Old Sports Cars, All-Wheel Drive ug Old School.

Mga banggiitang drivers nga angay’ng lantawon ning maong kulbahinam nga lumba nga gipresentar sa Castrol Edge uban sa pakigtambayayong sa Smart, Dewfoam, Kartzone, Outlast, Federal High Performance Tyres, Carlito’s Pizza, Shago Racing, The Racing Line ug Peak Summit Group mao sila si David G. Lim, Justin Neri, Randy Paray, Warren Go ug Philip Khan ‘Lik-Lik’ Lim ug uban pa. – BANAT NEWS