Madrid naka-ipsot

CEBU, Philippines - Naka-eskapo ang Madrid cagers ni team manager Ramel Luga bitbit ang 112-108 nga kadaugan batok sa Cantilan aron pagsakmit sa korona sa 2nd CarCanMadCarLan basketball tournament ning bag-o didto sa Sambag 1 Sports Complex sa barangay Sambag 1, ning siyudad.

Si Allen Esmejarda milansang og 22 puntos aron pangulohan ang Madrid.

Laing lima ka magduduwa sa Madrid ang mikulit sab og double-figures alang sa maong kadaugan. Si Jerome Mollaneda miligwat og 16 puntos, si Eming milugit og 14 puntos, samtang sila si Bogs Arpilleda ug Loren mipupo og 13 puntos matag usa ug si Jessi Escarten miabuno og 12 puntos.

Si Benito Ortuyo mao sab ang nangulo sa Cantilan ni team owner ug barangay Tisa no. 1 councilor Jeson L. Guardo sa iyang game-high 35 puntos, gisundan ni Andy Huelma pinaagi sa iyang 27 puntos ug Alvin Plaudin nga adunay 20 puntos.

Gitukod ni CarCanMadCarLan president Genito Guardo, ang usa ka bulan nga kompetisyon nagmalampuson tungod sab sa pagpaluyo sa Uniherb Philippines, usa sa nag-unang health companies nga tiggama sa nabantog na kaayong food supplements sama sa Arthro, Kidneycare, Heartvit, Diabet, Eyeberry ug Athan.

Ang CarCanMadCarLan gikuha gikan sa mga lungsod Carrascal, Cantilan, Madrid, Carmen ug Lanuza sa Surigao del Sur.

PUNTOS MATAG USA

MADRID (112) - Esmejarda 22, Mollaneda 16, E. Arpilleda 14, B. Arpilleda 13, Loren 13, Escarten 12, Guardo 9, Mollaneda 7, Arpilleda 6

CANTILAN (108) - Ortuyo 35, Huelma 27, Plaudin 20, Liwagon 13, Buenavides 5, Sahelan 4, Ong 2, Bertuso 2 (Yoyo R. Abayan)