Heartfelt, Orillaville gisubha'g daog

CEBU, Philippines - Gisubhan dayon og daug ang Heartfelt squad ni team owner Grace Alcoy ug ang Orillaville ni Placido Orilla sa ilang unang duwa batok sa tagsa-tagsa nila ka kaatbang sa pagsugod sa F. Llamas Youth Association (FYA) 1st Vice Mayor Mike Rama Cup basketball tournament niadtong Sabado didto sa Vicente Sotto Memorial Gym sa barangay Punta Princesa, ning dakbayan.

Ang Heartfelt milatos sa Team Jayra sa iskor nga 77-63, samtang ang Orillaville mimakmak sa Viking Haulers sa iskor nga 105-94.

Dobleng dungog ang naangkon sa Heartfelt gumikan kay ang ilang muse nga si Maria Roquisa Tabio mao man ang napiling "best muse." Ang 18-anyos nga si Tabio usa ka sophomore sa Nursing sa University of Cebu (UC)-Banilad Campus.

Sa wala pa ang pormal nga sangka, ang Team Pacman nga gipangulohan ni playing coach Jingjing Rama, mi-TKO sa mas batan-on ug host FYA Selection ni coach Rady Abarintos sa iskor nga 104-86 sa ilang exhibition game.

Si Rama uban sa beteranong si Mario Suarez, Mark Panerio ug kanhi USC Warrior Leon Floro Eleazar parehong mi-iskor og double figures.

Si Rama mao sab ang mihatag sa ganting salapi ngadto sa best players ug three-point kings atol sa maong duwa sa opening day.

Si Leonardo Rama maoy nangulo sa Heartfelt pinaagi sa iyang 20 puntos nga igo na kaayo alang kaniya nga tahurong best player of the game, samtang ang iyang teammate nga si Nico Laborte maoy napiling three-point king.

Ang Jayra nga gipanag-iya ni Jayra Liboon, gipangulohan ni Biking Rollon, kinsa mibugha og 27 puntos.

Sa laing duwa, sila si Ryan Villaver ug si Jay Perez parehong mi-iskor og 21 puntos alang sa Orillaville, apan si Villaver maoy napiling best player. Si Bryan Antiporta mi-iskor og tulo ka triples sa iyang nuybe puntos aron mahimong three-point king sa maong duwa. Iyang nalabwan ang pito ka three-point shots ni ex-USJ-R Jaguar Giovanni Canceko, kinsa maoy nangulo sa Viking Haulers ni Harold Go pinaagi sa iyang 30 puntos.   

PUNTOS MATAG USA

Unang duwa:

Heartfelt (77) - Rama 20, Lumakguid 14, Danding 12, Cabigas 11, N. Laborte 8, T. Laborte 6, Bensing 6

Jayra (63) - Rollon 27, del Mar 16, Aglipa 11, Salazar 5, Ylanan 2, Pacaña 1

Ikaduhang duwa:

Orillaville (105) - Villaver 21, Perez 21, Pegarido 18, Llegunas 13, Maucesa 11, Antiporta 9, Alceda 6, Enriquez 2, Brigoa 2, Trinidad 2
Viking Haulers (94) - Canceko 30, B. Medalle 19, Ardon 14, Limbaga 10, Tajada 8, Cal 6, Aguirre 6, Cambarijan 3