Olango Challenge gitakda
CEBU, Philippines - Gihikay na sa Philippine Business for Social Progress (PBSP) ang 2nd Olango Challenge nga gikatakda karong Abril 18 diha sa isla sa Mactan.
Gibana-banang moabot ngadto sa 80 ka swimmers gikan sa nagkalain-laing dapit sa nasud ang mosalmot sa kompetisyon nga gipaluyohan sab sa Philippine Amateur Swimming Association (PASA). Ang kompetisyon maoy bugtong open water marathon swimming event dinhi sa nasud.
Ning tuiga, ang kompetisyon adunay gamay nga kausaban, gikan sa channel crossing giusab kini ngadto sa 6-kilometer coastline swimming. Manukad kini sa Pacific Cebu Resort ug tapuson sa Tambuli Beach Club.
Ang Olango Challenge usa ka fund raising event aron pagtabang sa kabataan sa isla sa Olango.
Sa miaging 1st Olango Challenge, ang kita sa kalihukan gipatukod og classrooms didto sa Canadagsao Elementary School sa barangay Talima, Olango.
Ang registration magsugod karong Marso 27 diha sa PBSP office nga nahimutang sa 4th floor PLDT bldg sa Juan Luna Ave. sa Mabolo, ning siyudad.
Alang sa dugang mga kasayoran, mahimong motawag ni Riva sa (032) 232-5270. – BANAT NEWS
- Latest
- Trending
