Cebu Movers midemolis sa Evan Hulga Hardware

CEBU, Philippines - Gidemolis sa Cebu Movers System ang Evan Hulga Hardware pinaagi sa pag-iskor og 75-64 nga kadaugan aron pag-abante sa finals sa Guadalupe Athletic Association (GAA) 9th Founder's Cup niadtong Domingo didto sa Guadalupe Sports Complex.

Gumikan sa maong kadaugan, ang Cebu Movers System ni coach Dr. Boy Te maoy makigsakbang sa Pecus Stallions sa kampiyonato nga gikatakda karong Domingo. Ang Stallions miabante sa finals human banati ang 2171 Platoon sa iskor nga 79-69.

Si Vincent Reyes miposa og tulo ka triples sa iyang 25 puntos aron luwason ang Movers dihang gihulga kini sa Evan Hulga sa nanghinapos nga bahin sa duwa.

Si Bebot Alquizola mitampo og 12 puntos ug si Doming Leyson miamot og 10 puntos alang sa Movers.

Ang Evan Hulga gipangulohan ni kanhi Panther Lito Mabatid, kinsa mipupo og 24 puntos, samtang ang kanhi Tribu Sugbo coaching staff nga si Gaga Cabanilla miabuno og 10 puntos.

Puntos Matag Usa

Cebu Movers (75) - Reyes 25, Alquizola 12, Leyson 10, Gonzales 9, Ancot 7, Suzara 4, Labra 4, Te 4

Evan Hulga (64) - Mabatid 24, Cabanilla 10, A. Albia 9, Albia 8, Villahermosa 8, Sullano 3, Barellano 2. – BANAT NEWS