Amancia Brokers Mitumba sa Mactan Hotmen

CEBU, Philippines - Gipilde sa batan-ong Amancia Brokers ni team owner Filmore Amancia ang beteranong Mactan Hotmen sa kulbahinam nga duwa, 84-83 sa ilang exhibition didto sa Vicente Sotto Memorial Gym sa barangay Punta Princesa, ning siyudad.

Sa sayo pa, ang Pacman Team nga gipangulohan ni kanhi UC Webmasters star Mario Suarez, mimakmak sa MJDL-Aduana Selection, 108-91.

Ang maong exhibition game nga giulohan og "Clash of the Champions" gipasiugdhan ni Jingjing Rama sa Pacman Team, kinsa maoy kampiyon sa Pacman Cup sa miaging tuig.

Si Freddie Niñel, kinsa mipasulod og mga crucial shots sa daginutong oras, maoy napiling MVP. Nadawat niya ang ganting salapi ug tropeyo.

Mga players nga naapil sa Mythical Five mao sila si Biboy Potencioso ug Marl Señeres sa Amancia Brokers ug sila si Marvin Sillar ug Ronnie Ruiz sa Mactan Hotmen.

Laing tulo ka players sa Amancia mi-iskor sab og double figures. Si Potencioso mitampo og15 puntos, gisundan ni Señeres sa iyang 13 puntos ug Marvin Tundag nga adunay 11 puntos.

Ang Hotmen ni coach Dacky Ugay ug skipper Bingo Matugas nakatabla sa katapusang higayon, 55-all sa ulahing bahin sa third period pinaagi sa usa ka free throw ni Ronnie Clavano.

Puntos Matag Usa

Unang duwa:

Pacman Team (108) - Suarez 33, Rama 22, Navarro 11, Talas 10, J. Rama 9, Pumareja 9, Baclay 6, Panerio 6, Dejos 4

MJDL Selection (91) - Herbito 26, Gasul 13, Daan 13, Medalle 11, Bacall 6, De Gracia 4, Jordan 4, Sepe 4, Davila 3

Ikaduhang duwa:

Amancia (84) - Niñel 18, G. Giducos 17, Potencioso 15, Señeres 13, Tundag 11, Manulat 5, Aliposa 4, J. Giducos 1

Mactan Hotmen (83) - Sillar 27, Ruiz 22, Amores 13, Mata 9, Tacocong 7, Ararao 4, Clavano 1. - Gabby G. Malagar (BANAT NEWS)