CEBU, Philippines - Mihakot ang Dancesport Team-Cebu City og pito ka golds, siyam ka silvers ug pito ka bronzes aron sa pagpanag-iya sa korona sa 1st leg sa tulo ka hut-ong nga DSCPI National Dancesport Rankings and Competition dili pa dugay didto sa Philsport Arena sa Pasig City.
Si Cebu City Sports Commission (CCSC) dancesport directress Eleanor Hayco walay kukaluya nga mipakita sa iyang talento sa kinatibuk-ang kompetisyon aron ayudahan ang DTCC sa ilang malampusong kampanya nga mikabkab og duha ka golds ug usa ka bronze sa managlahing kapares.
Si Hayco ug Lloyd Bartolini nidaog sa modern standard special event 2. Nidaog sab sila og bronze sa Grade B standard action. Si Hayco uban ni Anselmo Estellore mao sab ang nanghawod sa latin SE 2F.
Sama ni Hayco, si Estellore nidaog sab og bulawan sa SE 1F latin uban ni Karla Josefina Fornolles.
Laing kugihang dancesport official nga si Ricca Alix ug ang iyang dugay na kaayong katimbang nga si Renante Saldua nidominar sa senior A standard competition. Nidaog sab sila og silver sa standard SE 2F.
Si Prince Laurence Inocando naghari sa standard SE 1F event uban ni Danilo Gagano. Mihakot sab sila og silver sa SE 1M uban ni Lark Jabonero.
Duha ka batan-on nga sila si Kelly Deluvio ug Grace Diana Silud, nipakita sab sa ilang kusog pinaagi sa pagkabkab og bulawan sa junior A standard ug duha ka silvers sa standard C ug latin junior A.
Laing duha ka Deluvio nga sila si Jason ug Kathlene miugkat og bulawan sa junior C standard, samtang sila si Paolo Cañete ug Jamaeca Thea Nelmida maoy nanghawod sa junior A latin ug midaog og usa ka silver sa standard action ug usa sab ka bronze sa junior C latin.
Wala sab magpapiri sila si Roque Marquez ug Rhea Marquez nga nanghawod sab sa junior C latin, samtang sila si Virgianie Oyao ug Jefferson Pimentel mitunol og bulawan pinaagi sa youth A latin.
Misanag og maayo ang adlaw sa DTCC dihang sila si Charlea Lagaras ug Ronnie Vergara naghari sa premiere Grade A latin. Si Lagaras nidaog sab og silver sa SE2M event uban ni Hermi Gemini, samtang sila si Bernie Tumarong ug Miljane Camacho nidaog og bronze sa Grade A standard.
Laing mga pambato sa DTCC nga nitunol og silvers mao sila si John Paul Mocorro ug Therese Quilaton sa standard juvenile, Marlon Aliñi ug Elsa Zets sa senior C standard ug Jeric Canoy ug Jessa Mae Briones sa youth C ug A latin actions.
Samtang ang mitunol og bronze mao sila si Gabriel Gullem ug Rhona Rosales sa standard juvenile, Wayland Mancera ug Keyla Mancera sa junior C latin, Jared Geson ug Jen-Jen Pogoy sa youth C standard ug Wilber Auzon ug Pearl Cañeda sa youth A latin. – BANAT NEWS