Cebu Niños disgrasya sa Batang Global, bugto 11 ka daog sa ilang korte

CEBU, Philippines - Nabugto ang 11 ka sunod-sunod nga daog sa defending National Champion M. Lhuillier-Cebu Niños sa ilang korte nadisgrasya kini sa bisitang Harbour Centre-Taguig Batang Global, 80-78 sa pagsugod sa Cebu City Leg sa 2009 Smart Liga Pilipinas Conference II sa miaging gabii sa Cebu Coliseum.

Sakit kaayo ang nahiagomang kapildihan sa Cebu Niños kay ila man nga gidominar ang tibuok duwa hangtod na sa katapusang dos minutos.

Ang Cebu Niños milabaw og 14 puntos sa sayong bahin sa ikaduhang kuwarter, 27-13.

Si Harold Sta. Cruz maoy mihatag og uno punto nga bentaha ngadto sa Batang Global sa nahabiling 18 segundos human sa foul ni Bruce Dacia, 79-78.

Sa sunod nga posisyon, si Dacia nakahimo'g five-second inbound violation aron ibalik ang posisyon pabor ngadto sa Batang Global ni Mayor Freddie Tinga ug coach Robert Flores.

May purohan untang modaog ang Cebu Niños, apan si Mark Ababon nasipyat sa iyang drive. Atol sa nilangkatay, si Marlon Basco napugos pag-foul ni Lou Gatumbato, kinsa miposa og usa ka free throw sa katapusang singko minutos nga maoy mikandado sa kadaugan.

Ang Cebu Niños ni Michel Lhuillier ug coach Raul 'Yayoy' Alcoseba milabaw og sayes puntos sa katapusang dos minutos sa duwa, 78-72. Apan kalit lang nga misikit ang Taguig dihang nakamugna og duha ka turnovers ang Cebu Niños, 76-78 pinaagi sa lay-ups nilang Marlon Adolfo ug Marvin Ortiguerra.

Sila si Adolfo ug Ortiguerra maoy nangulo sa Taguig nga mitimbre og 15 puntos matag usa, samtang ang pilderong Cebu Niños gipangulohan ni Dacia sa iyang 21 puntos, gisundan ni Basco nga miabuno og 19 puntos.

Puntos Matag Usa

TAGUIG (80) – Adolfo 15, Ortiguerra 15, Zagala 13, Sta. Maria 11, Gatumbato 8, Sta. Cruz 5, Reguera 4, Kiram 3, Butel 2, Tolomia 2

CEBU (78) – Dacia 21, Basco 19, Padilla 12, Ababon 7, Capati 6, Mepana 5, Enriquez 3, Cavan 3, Tangkay 2. – BANAT NEWS