CEBU, Philippines - Atubangon sa mas lig-on nga Enervon-C/UC Webmasters ang Virginia Foods Inc./CIT Wildcats, samtang ang Prime Asia/UV Lancers makigsangka sab batok sa R. Lapid’s Chicharon/DBTC Greywolves sa pagpadayon sa 3rd Cebu Schools Athletic Foundation, Inc. (CESAFI) Partner’s Cup diha sa Cebu Coliseum.
MGA DUWA KARON
(Cebu Coliseum) 4:00 pm
Prime Asia/UV vs. R. Lapid’s/DBTC 5:30 pm
Virginia Foods/CIT vs. Enervon-C/UC
(Dumanjug Sports Complex) 7:30 pm
Aerosol/USC vs. CDO Idol/USPF
Sa labing unang higayon ning tuiga, ang CESAFI-Partner's Cup mobisita sa lungsod sa Dumanjug sa habagatang bahin sa Sugbu diin magtakos ang Aerosol/USC Warriors ug ang CDO Idol/USPF Panthers aron buk-on ang ilang panagtabla.
Ang duha pulos nagbitbit og 2-3 win-loss records.
Human maka-ipsot batok sa Aerosol/USC Warriors, 75-70 sa miaging Miyerkules, ang Enervon-C/UC buot na sab mokulit og laing daog batok sa Virginia/CIT kinsa nagpanikad nga mobangon human sa ilang 73-91 nga kapildihan gikan sa mga kamot sa R. Lapid’s/DBTC Greywolves.
Ubos sa liderato ni June Mar Fajardo, ang Enervon-C/UC andam kanunay og tagana ug nanghinaut nga magpadayon molingkod sa ikaduhang dapit, apan dili angayang kompiyansahan ang Virginia/CIT nga gipangulohan ni Jerry Jaca ug ex-pro Gilbert Demape.
Gawas ni Fajardo, laing mosuporta sa opensa sa Enervon-C/UC mao sila si Moncrief Rogado, Janssen Abella, Edward Pao ug
Kevin Quilantang uban nilang Kelvin Juliane, Lawrence Agas, Ralph Ramos, Robinson Mohamad ug Rommel Luceño.
Sa laing bahin, ang 3-2 Prime Asia/UV magsalig sab nilang Edrian Lao, Ralph Olivares, Bonifer Sendrijas, Harold Cincoflores, Phil Mercader ug Ritcum Dennison, samtang ang R. Lapid's Chicharon/DBTC magsandig nila ni Chris dela Rama, Ricmar Perturbos, Joseph Villaver, Rudy Enterina Jr., Allain delos Santos ug Celso Colegado Jr.
Didto sa Dumanjug, ang CDO Idol/USPF Panthers moharong sa Aerosol/USC Warriors.
Gisaligan sa opensiba sa Aerosol/USC Warriors mao sila si Giovanni Padillo, Ryan Carlo Padayao ug Joven Cid Cortes, samtang ang CDO Idol/USPF Panthers magsalig sab sa ilang playing coach Mike Sereño, uban nilang Elvin Labres, Randy Colonia ug Ellison Rivera. (BANAT NEWS)