Ang tseke ni Wakee!

CEBU, Philippines - Dugay na akong nakaila ni Rex "Wakee" Salud ug gani ako siyang higala kaniadto sa nagkober pa ako og boxing ilabi na kadtong iya kanhing mga promotion ug ingon man kang Johnny Elorde.

Nabugto ang among komunikasyon ni Wakee dihang wala na ako magkober og boxing ug ambot og nakaila pa ba siya kanako kay wala pa man ko'y "uban" niadtong tungora.

Niadtong Martes, Pebrero 17 usa sa akong mga higala nagtaho kanako nga nagbansiwag kuno ang ngalan sa kanhi nakong amigo sa pamantalaan tungod sa kasong mi-untol nga duha ka tseke nga nagkantidad og 10 milyones pesos (P5 million matag usa) kay wala kini igong pundo sa bangko.

Hesus, kun tinuod kini, nganong boxing man maoy gipili ni Wakee nga sports dili man basketbol nga bola ra man untay magsigig untol?

Mura'g katuohon ako ug dili sa maong panghitabo, apan kun imo sab balikon ang kasaysayan, usahay magtago-tago sab kini si Wakee ilabi na og maig-an siya sa masiao kay usa man siya ka masiao financier kaniadto. May pagka gwatsinanggo man tuod ni si Wakee apan maayo siyang modala sa iyang mga higala.

Maong nahikurat ako dihang nakabasa ako sa usa ka artikulo sa usa mga local dailies nga gisuwat sa ako sab nga higala nga si Karlon Rama nga usa ka dibisyon sa Court of Appeals o CA nga nagmando nga ipakanaog sa lower court ang usa ka kaso aron sa pag-review. Ang petition gitawag og certiorari nga nagmando sa usa ka higher court sa pagduso og kaso balik sa lower court.

Tulo ka huwes sa CA nagkahiusa sa ilang pagpakanaog og hukom nga ibasura ang petition alang sa certiorari nga gipasaka ni Wakee nga nagmando sa pagpataban sa iyang katigayonan nga maoy ibayad sa iyang utang nga P10 milyones gikan sa usa ka Almacita Paray niadto pang tuig 2004.

Ang tulo ka huwes nga mibasura sa petition ni Wakee mao sila si Justices Stephen Cruz, Antonio Villamor ug Florito Macalino. Migawas ang desisyon niadto pang Enero 30 ug nadawat niadto lang Pebrero 10, upat ka adlaw sa wala pa ang Valentine's Day.

Mihangyo si Paray sa korte nga kun modaog siya sa kaso, iyang kuhaan ang usa ka parcel sa yuta ni Wakee aron pagseguro nga kabayran gyud siya.

 Ang kaso na-raffle na karon ug gihuptan ni Judge Francisco Seville sa Municipal Trial Court in Cities (MTCC).

Gipanghimakak ni Salud ang maong kaso nga naglambigit kaniya. Kun unsa may kalamboan sa maong kaso, ato lang paabuton ug dili una nato hukman si Salud.  

* * *

Usahay dili nako kalikayan nga mahimuot akong maghuna-huna sa higayon nga makadungog ako nga doktor na si Manny Pacquiao. Daghan kaayong milagro sa boksing nga nahimo ni Pacquiao sa kalibotan ug lagi sa maong milagro nakapahimo niyang doktor-- ato kining klarohon Doctorate for Human Kinetic.

Kining kinetic kun imong tan-awon sa dictionary, ang hubad "relating to motion" apan dili mahimo ingnon nga kinetics kay usa man kana ka sanga sa chemistry.

 Ang rason nganong malingaw ako kay kitang mga Pinoy ilabi na gyud ang mga Sugbuanon hilabihan ra ba gyung bugal-bugalona. Sa kadugayan, daw sa maluoy ako ni Pacquiao nga mahimo nang dangpanan sa mga may sakit kay lagi doktor man siya ug puyra lang sa nakasabot sa maong titulo.

Dihang si Dr. Susana B. Cabahug diha pa nag-opisina sa DECS, dihang usa ka tawo nga nangayo'g tambal kaniya ug miingon "dok mangayo ta ko nimo'g tambal." Gi-ingnan siyang di man tawon ko doctor of medicine Dong, doctor of philosophy man ko.

Syaro sab kini si Pacquiao wala pa man sab matagbaw sa kadaghan sa titulo nga itawag kaniya. Usahay gud maglibog ta og unsay atong gamiton ug kun unsay labing haum.

Tingali ang mga boxing writers mogamit na nga si Filipino boxing icon nga si Manny "Pacman" Pacquiao, DHK ang boxing hero ug pound for pound king mosaka na usab sa ring. Mao ray gidangat ani. Ug masamdan siya, laing doktor ang motambal?

Kun buhi pa si Dr. Jose P. Rizal, ang tinuod nga national hero nga nagpakamatay alang sa yutang natawhan, mangluod siya kanato. Gawas sa iyang alyas nga Dimasalang ug Laon Laan, wala nay laing titulo si Rizal ug doktor ra gyud.

May 50 ka tuig karon, si Pacquiao na sab ang mopilit sa posporo ug himoan og monumento sa Luneta. OK ra? Pag-tsur mo ha? - BANAT NEWS