CESAFI-Partner's Cup volley Tournament sugdan na

CEBU, Philippines - Moulbo na ang labing unang Cebu Schools Athletic Foundation, Inc. (CESAFI) Partner’s Cup volleyball tournament karong adlawa diha sa University of San Carlos (USC)-main gym.

Sa opening game nga gitakda sa alas-8 sa buntag, ang University of San Jose-Recoletos (USJ-R) nga gipaluyohan sa Ave Maria Sanctuary Park mohamag sa Virginia Premium Corned Beef/Cebu Doctors’ University (CDU).

Ang USJ-R ni Cebu Sports Hall of Famer coach Grace Antigua mopaduwa sa iyang rookies aron mahait ang ilang abilidad sa dili pa sugdan ang CESAFI ning tuiga.

Sa laing duwa, ang R. Lapid’s Chicharon/Southwestern University (SWU) moharong sa Enervon-C Multivitamins/University of Cebu (UC).

Ang SWU ni coach Joreem Yu bitoonan nilang CESAFI beach volley champs Danika Yolanda Gendrauli ug Lorie May Layno.

Sa laing bahin, ang Aerosol Lion Tigers/University of San Carlos (USC) makigsangka batok sa Prime Asia Pawn and Jewelry Shop/University of the Visayas (UV) alang sa ikatulong duwa.

Sa hapon, ang UV makigsakbang sa USJ-R, samtang ang CESAFI women’s indoor volleyball champion CDO Idol Cheese Hotdog/University of Southern Philippines Foundation (USPF) makigsangka batok sa UC ug ang katapusang duwa ning adlawa, ang SWU moharong sa USC. - BANAT NEWS