Carcel tipas sa laing level

CEBU, Philippines - Ang masaarong go-kart racer nga si Juan Antonio Carcel gikatakdang makiglumba batok sa mas daku pa niya diin siya molumba sa mas taas nga dibisyon ning tuiga sa National Karting Series nga buksan sunod semana didto sa Camona, Cavite.

Nasayran, si Carcel, tinun-an sa PAREF-Springdale molabyog sa KT Formula SL.

Gumikan niini, si Carcel, usa sa mga major awardees sa 27th Sportswriters Association of Cebu-San Miguel Corporation (SAC-SMC) All-Cebu Sports Awards kagabii didto sa Casino Español, makigbatok sa maguwang pa niya ug mas eksperyensiyado nga kaatbang.

Human nidaog sa junior "Karter of the Year" sa miaging tuig nga Shell Helix, nabatyagan ni Carcel nga panahon na niya nga motipas sa mas taas nga level.

Samtang si Tonyo mangindahay sa lig-on nga kategoriya, ang iyang manghod nga si Kali magpabilin sa mini ROK division. – BANAT NEWS