SHSJ, UC, CIT subha'g daog

CEBU, Philippines - Ang Sacred Heart School- Jesuit (SHSJ), University of Cebu (UC) ug ang Cebu Institute of Technology (CIT)-Hoop It Up mikulit og duha ka sunod-sunod nga daog sa managlahing dibisyon atol sa pagsugod sa Cebu Youth Basketball League (CYBL) 2009 niadtong Sabado didto sa Sacred Heart School Jesuit (SHSJ) gym sa General Maxilom Avenue, ning siyudad.

Sa Tropang Growee 10-Under division, ang SHSJ mipukan sa Don Bosco sa iskor nga 34-21 ug ila sab nga gilubong ang PAREF Springdale sa iskor nga 28-12.

Yano sab nga gilubong sa UC ang University of Southern Philippines Foundation (USPF) sa iskor nga 94-44 ug SHSJ-A sa iskor nga 68-48 sa division A sa 16-Under.

Sa division B sa 16-Under, ang CIT-Hoop It Up nimasaker sa SHSJ-B, 61-28 ug gisunod og tumba ang University of San Jose-Recoletos (USJ-R) sa iskor nga 66-52.

Sa bugtong duwa sa Tropang Growee 13-Under, ang defending champion University of San Carlos (USC)-North naka-eskapo gikan sa mga kamot sa Royal Oaks International School (ROIS) bitbit ang 44-42 nga kadaugan sa division A.

Sa laing duwa sa 16-Under division, ang USC-South miunay'g lubong sa ilang igsuong koponan USC-North sa iskor nga 46-39, samtang ang Salazar Colleges of Science and Institute of Technology (SCSIT) milatigo sa PAREF Springdale, 45-41 sa division B sa 16-Under.

Gisubhan og daog ang ROIS ug ang Don Bosco batok sa tagsa-tagsa nila ka kaatbang sa laing duwa sa Tropang Growee 10-Under division.

Ang ROIS mipukan sa USC-South sa iskor nga 15-9, samtang ang Don Bosco nakalingkawas sa kulbahinam nga duwa batok sa USC-South, 22-20.

Ang CYBL 2009 season nga gipaluyohan sa Growee gisalmotan sa 26 ka teams sa tulo ka managlahing age brackets: 16-Under, Tropang Growee 13 ug 10-Under.

Ang mga koponan gibahin sa duha ka dibisyon -- A ug B sa 16 ug 13 Under diin ang mga lig-ong mga koponan moduwa sa division A.

Ang mga duwa himuon sa matag weekend diha sa SHSJ-Mango Campus Gym o dili ba sa Don Bosco College gym. – BANAT NEWS