Cebu - Eksplosibong aksiyon ang matigayon karon diin ang defending champion University of Southern Philippines Foundation (USPF) makigsakbang sa mga tang-ang team sa 4th Shakey’s Girls Volleyball League sa USPF gym.
Human nanghawod sa Bracket-A pinaagi sa pagsilhig sa lima ka duwa sa miaging semana, ang kampo ni Jordan Paca sa USPF moharong sa second-ranked Abellana National High School sa Bracket-B alang sa crossover semifinals karong buntag.
Kinahanglan nga dili mapaltos ang USPF batok sa ANHS aron makakuha og pasaporte sa kampiyonato nga gitakda sa ala 1:30 sa hapon.
Sa laing semis match, ang runner-up sa miaging tuig, ang Pajo National High School makigtakos sa Don Gerardo Ouano Memorial National High School.
Ang 4th Shakey’s Girls Volleyball League gipaluyohan sab sa Philippine Sports Commission, Dunkin’ Donuts, Petron, Toby’s ug Nature’s Spring. – BANAT NEWS