Amancia miilog sa liderato sa Collector's Cup

Cebu - Nasakmit og balik sa Amancia Brokers ang liderato human ilang gipukan ang Pimentel Brokers, 76-65 sa bugtong duwa sa 35-old below division sa nagpadayon nga 14th Collector’s Cup didto sa Vicente Sotto Memorial Sports Complex sa barangay Punta Princesa, ning dakbayan.

Bitbit ang 4-1 nga baraha, ang Amancia mao karon ang lig-ong kontender nga moangkon sa korona ug seguradong magkagidlay ang defending champion MJDL Brokers, kinsa nahimutang sa ikaduhang dapit bitbit ang 3-2 nga baraha.

Ang MJDL mao lang ang bugtong nakapilde sa Amancia niini nga liga. 

Sama sa naandan, si Freddie Niñel lang gihapon maoy nangu sa Amancia pinaagi sa iyang 19 puntos. Nakakuha siya og suporta gikan ni Biboy Potencioso, kinsa midugang og 15 puntos ug sa laing tulo ka kaubanan nga mikimada og double figures.

Ang kanhi point guard sa General Milling Megamix nga si Michael Macasero maoy nangu sa Pimentel Brokers sa iyang 18 puntos. Si Adonis Morata miamot og 14 puntos alang sa Pimentel nga midailos ngadto sa 2-3 nga baraha.

Sa sangka sa 35-above, ang Office of the Commissioner (O-Com) mipukan sa Chamber of Customs Brokers Inc. (CCBI) sa iskor nga 93-82, samtang gilubong sa Port Operations Division (POD) ang Cebu-Customs United Personeros Association (C-CUPA) sa iskor nga 96-70.

Ang O-Com, POD ug C-CUPA parehong naghupot karon og 3-2 nga baraha, samtang ang CCBI (0-5) ug Mactan Hotmen (4-0) mao na lang ang teams nga wala makatilaw og daog sa 35-above division.

Puntos Matag Usa

 Amancia Brokers (76) - Niñel 19, Potencioso 15, B. Giducos 13, e. Giducos 11, Tundag 10, Oñate 4, Miscala 2, Manulat 2

Pimentel Brokers (65) - Macasero 18, morata 14, Moral 9, Palero 7, Bensi 5, Manlosa 3, San Pablo 3, Largosa 2, Cabalse 2, Legaspi 1. – BANAT NEWS