Amateur Boxing Challenge sa Consolacion

Cebu - Laing makapaukyab nga amateur boxing   ang ipahigayon ugma diha sa barangay Nangka, Purok 1 ug 2 sa lungsod sa Consolacion, Cebu.

Ang boxing event nga ulohan og "Pakapaka sa Barangay Nangka Amateur Boxing Challenge 2009" sugdan sa alas-7 sa gabii.

Adunay 20 ka paresan ang moladlad sa ilang abilidad ug magsinukliay kini sa kumo sulod sa tulo ka hugna.

Una kining proyekto ning tuiga sa Consolacion Boxing Academy (CBA) ubos sa liderato sa kugihan ug maabtikong konsehal sa Brgy. Cansaga, Consolacion Rudy 'Rod Maloy' Maloloy-on.

Si Maloloy-on maoy nangusog ug nag-promote alang sa kalamboan sa boksing, dili lamang sa tibuok barangay sa Consolacion, lakip na sab sa mga nagkalain-laing barangay sa lalawigan ug siyudad sa Sugbu.

Sa iyang bahin, si Nangka brgy. captain Rey Cataluña, midasig ug miawhag sa tanang mga batan-on nga adunay abilidad sa boksing sa pagsalmot sa maong torneyo nga gipaluyohan sab ni Vice Mayor Ember V. Alinsug.

Gawas sa boksing nga himuon matag bulan sa nagkalain-laing barangay sa Consolacion, naglaraw sab sila nga mohimo og boxing seminarorientation uban sa mga opisyal sa Games and Amusement Board (GAB) ug Amateur Boxing Association of the Philippines (ABAP). – BANAT NEWS