Concepcion ilakip sa Pacquiao-Hatton fight card

Cebu - Andam na sab nga moatubang og laing malisud nga tahas si Bernabe Concepcion human sa iyang kadaugan batok ni Sande Otiena, kinsa iyang gi-TKO sa ikalimang hugna aron pagsakmit sa bakanteng WBC International featherweight belt niadtong Domingo didto sa Araneta Coliseum.

Ang 20-anyos ug garbo sa Virac Catanduanes nga si Concepcion, kinsa nidaog sa ika-16 nga sunod-sunod niyang away andam na karon nga moatubang sa mga banggiitang boksidor sa iyang dibisyon.

Ang manager ni Concepcion nga si Aljoe Jaro nagkanayon nga tungod sa maong kadaugan, posibleng maapil ang iyang batos sa padayon karong gihikay nga superfight tali ni Manny Pacquiao ug Ricky Hatton karong Mayo 2 didto sa Las Vegas.

Matud pa ni Jaro nga usa sa mga gipilian nga atubangon ni Concepcion (28-1-1, 18KOs) mao ang Mehikanong si Heriberto Ruiz, kinsa mipukan ni Rey 'Boom Boom' Bautista niadtong Nobiyembre 22, 2008.

Usa usab sa mga gihugon-hugonang ikasangka ni Concepcion mao ang WBC champion ug kanhi karibal ni Pacquiao nga si Oscar Larios. Si Larios bag-o pang nidaog batok ni Takahiro Aoh sa Japan niadtong Oktubre sa miaging tuig. – BANAT NEWS