Game fishing o "Angling"

Cebu - Karon pa lang gani kasayo, nangandam na ang First District sa Surigao del Norte ilabi na gyud ang lokal nga kagamhanan sa lungsod sa Pilar alang sa umaabot ug labing dakung kalihukan nga mao ang Siargao Invitational Game Fishing Competition unya sa Mayo 7-9.

Ang maong kalihukan nga suportado ni Department of Tourism secretary nahimong inila sa ilang unang paglusad niini niadtong Abril sa miaging tuig diin mismo si Presidente Gloria Macapagal-Arroyo mitambong sa opening ceremony.

Dinhi sa Pilipinas, wala pa kaayo mosikat ang game fishing nga gitawag sa mga Amerikano og "angling". Dili nato malalis nga ang basketbol ug boksing maoy mga paborito natong tan-awon, apan masaligon ang tigpasiugda niini nga si Congressman Francisco Matugas, Sr. ang giilang "Father of the Tournament" nga tungod niining International Game Fishing, mabutang gyud sa mapa ang Pilipinas.

Ang game fishing usa lang sa labing inilang tourist attraction didto sa isla sa Siargao sa Surigao del Norte nga sakop ni Congressman Matugas. Ang labing ilado mao ang "surfing" kay ang balod sa Siargao maoy paborito sa mga langyaw nga turista kay kuno lupig ang salida sa telebisyon nga "Hawaii Five-0." 

* * *

Susama sa golf, ang game fishing usa ka sporting event nga adunahan ang mosalmot. Gibana-bana nga kapin sa 100 ka mga anglers ang mosalmot sa ikaduhang higayon nga gikan sa Australia, Canada, Malaysia, Taiwan, Russia ug sa Estados Unidos. Hinuon, adunay pipila ka mga anglers nga Pinoy ang mosalmot aron makigtigi kun kinsa kanila maoy makabingwit sa labing daku ug labing bug-at nga isda diha sa kadagatan.

Gidapit pag-usab ni Conressman Matugas si Presidente Arroyo sa pagtambong sa closing ceremony ug maoy mohatag sa P300 nga ganti ngadto sa mga mananaog.

Si Congressman Matugas malaumon nga ang game fishing makatampo og daku ngadto sa turismo aron molambo ang ekonomiya sa tibuok Surigao del Norte. Usa niini sa ilang pambato ngadto sa mga lokal ug langyaw nga turista mao ang Cloud Nine nga usa ka mangrove forest nga may gidak-on nga 8,760 ka hektarya nga gilibotan og mga baybayon nga adunay pino ug puti kaayong bas.

Kun kinsa kadtong gusto mosalmot sa tulo ka adlaw nga 2nd International Game Fishing Tournament, gi-awhag sa pagtan-aw sa website www.siargaogamefishing.com. Alang sa dugang kasayoran, mahimong mo-kontak pinaagi sa e-email ngadto sa mga sakop sa organizing committee ngadto ni [email protected] ug mahimo sab nga motawag ni Zeny sa 0917-8130036 ug ngadto ni Atty. Gordon Uy sa Goodcatch Fishing Tackle sa sa landline 02-303-5070.

Gipahibalo sab sa mga tigpasiugda nga gipangulohan ni Congressman Matugas nga ang Cebu Pacific magsugod na'g biyahe sa ilang rota Cebu-Siargao ginamit ang ilang 70-seater ATR plane nga katulo mobiyahi matag semana --Lunes, Miyerkules ug Biyernes.

* * *

Una nakong gikahimamat si Congressman Matugas didto mismo sa Surigao del Norte dihang siya pa ang gobernador didto. Bag-ohay lang kami nagkita ug usab niadtong Disyembre 22 atol sa Christmas party sa Reliable Recruitment Agency diha sa may Rain Tree Mall pinaagi sa pagdapit sa akong suod nga higala nga si Romy Cal, ang kanhi champion coach sa CIT Wildkittens sa uwahing bahin sa 1990. Didto sa maong salo-salo, nagkita usab kami ni   Congressman Guillermo Romarate, Sir Mike Sususco, ang finance officer sa San Miguel Lighterage and Shipping Corporation ug ingon man si Arlene Tongco nga nagtungha og abogasiya sa UV Gullas Law School.

Ang anak ni Congressman Matugas nga si Bingo, maoy Customs collector karon diha sa Mactan. Ang ilang team sa District Collector's Cup ubos ni coach Dacky Ugay nagbitbit na og 2-0 nga baraha sa 35 years above category.

* * *

SG Miscellaneous. Advance Happy Fiesta to all the Cebuanos this coming January 18. Viva Senyor Sto. Niño.  - Gabby G. Malagar (BANAT NEWS)