Realtors nakauna sa Painters
Cebu - Nagkinahanglan na lang og usa ka daog ang defending All-Filipino Cup champion Sta. Lucia Realtors aron mo-abante sa semis dihang ilang gilubong ang Rain or Shine Elasto Painters, 101-84, sa Game-1 sa "best-of-three" quarterfinals sa KFC-PBA Philippine Cup kagabii didto sa Araneta Coliseum.
Niratsada dayon ang Realtors sa unang duha ka kuwarter, apan misumbalik ang Painters og mga puntos aron mapahakan ang labaw sa first-half, 40-37.
Nahitabo ang usa ka lamok-lamok sa mga magduduwa sa isig ka kampo sa third quarter dihang nagkainitay ang duha ka sentro nga sila si Jay-R Reyes ug Marlou Aquino. Sa katapusang 5:33 sa third quarter gihapos usab ni Gabe Norwood ang bola ngadto sa nawong ni Nelbert Omolon. Sila si Aquino ug Norwood parehong gipagawas sa korte tungod sa flagrant fouls.
Tungod niini, si Joseph Yeo nakahigayon og kiat ug mipasulod kini og tulo ka three-point shots aron pangulohan ang rally sa Realtors, kinsa miabante og 23 puntos sa final period.
Gumikan sa pagkawagtang ni Norwood, wala na makasagang ang Painters sa mga bangis nga atake sa Realtors.
Si Omolon miposte sa iyang career-high 30 puntos aron pangulohan ang iyang koponan ug si Yeo midiga og 23 puntos.
Ang Painters nga peligrong mapalagpot karong Biyernes, gipangulohan ni Reyes pinaagi sa iyang 16 puntos uban ang 12 ka rebounds, samtang ang usa sa mga sinaligang Fil-Am nga si Solomon Mercado mipuga og 12 puntos. - Lemuel P. Maglinte (BANAT NEWS)
- Latest
- Trending
