Ganoy gustong mo-away ni David Diaz sa Araneta

CEBU – Nagtinguha karon si Sydney-based Filipino lightweight Ranee Ganoy nga mokatkat sa ring karong umaabot Marso 15 didto sa Araneta Coliseum. Gustong atubangon ni Ganoy ang kanhi WBC champion David Diaz sa away nga gipasiugdahan ni Top Rank Promoter Bob Arum.

Ang gipasabot nga away ni Ganoy mao ang championship double-header IBF/IBO flyweight champion Nonito “The Filipino Flash” Donaire nga mokatkat sa 115 pounds batok ni WBO super flyweight champion Fernando Montiel samtang laing makigbugno sa ring si WBC light flyweight champion Brian Viloria kinsa nagtinguha nga malabni pagbalik ang world title pinaagi sa pagpukan ni Mexican Ulises Solis.

Matud pa ni Danny Coyne, kinsa maoy co-manager ni Ganoy kauban si Hermie Bohol, nga kun dili man mahinayon ang away ni Randy Suico batok Diaz, andam sila, ilabi na si Ganoy nga makigkontra ni Diaz kun mo-uyon si Arum.

Kahinumduman gipilde ni pound-for-pound king Manny Pacquiao si Diaz niadtong Hunyo sa milabay’ng tuig samtang si Ganoy nakahiagum usab sa iyang kapildehan batok sa Amerikanong si Fernado Angulo sa ilang IBF eliminator bout didto sa South Africa.

Gidugang ni Coyne nga gustong mobangon si IBF Asia Pacific lightweight champion gikan sa iyang pagpapukan didto sa Africa ug matigayon lang kini kun iyang makontra ang usa sa banggiitang boksidor sa kalibutan sama ni Diaz. (Arnie P. Atuel) (BANAT NEWS)