Sta. Lucia sulod sa Quarterfinals
CEBU - Abante na sa quarterfinals ang Defending All-Filipino Cup champion Sta.Lucia Realtors dihang ilang gipanitan ang Red Bull Barakos, 102-98 sa nagkainit nga elimination round sa KFC-PBA Philippine Cup kagabii didto Araneta Coliseum.
Ang Realtors nga nisaka karon sa 10-8 win-loss rekord nilampos sa paglangkat sa katapusang luna alang sa quarterfinals aron mahatagan og higayun ang ilang koponan sa pagdepensa sa ilang titulo.
Nagpungasi ang atake sa Red Bull sa sayung bahin sa duwa dihang ilang gipakuratan ang Realtors sa first half, 63-44. Ang rookie nga si Jeff Chan mipabuto og 11 puntos samtang si Cyrus Baguio midiga og 17 puntos aron pangulohan ang ratsada sa Red Bull.
Apan pag-abot sa third period, ang Realtors nipagana sa ilang opensiba aron pahakan ang labaw sa Red Bull. Ang produkto sa De la Salle University (DLSU )Green Archers Joseph Yeo ug ang beteranong si Dennis Espino mikumbuya og 22 puntos aron inaog sa nuybe puntos ang labaw, 86-75.
Sa final period, padayon ang rally sa Realtors, si Yeo nagpabiling init sa three-point line inubanan sa mga atake nila ni Espino ug Kelly Williams sa ilawm nga bahin sa ring aron hingpit nga mapapas ang dakong labaw sa Red Bull.
Si Yeo mirehistro ug 25 puntos aron ituboy ang iyang koponan ngadto sa kadaugan. Si Dennis Espino mikulit og 23 puntos samtang ang Fil-American nga si Kelly Williams mibahug og 15 puntos uban ang 11 ka rebounds.
Sa ilang bahin, ang Red Bull nga manamilit na sa liga nga nagbitbit og 5-13 win-loss nga baraha gipangulohan ni Chan nga miposte og 23 puntos, lakip na ang lima ka three-point shots nga gipatusak niini. (BANAT NEWS)
- Latest
- Trending
