Cebu - Yano kaayong gilampaso sa Cebu Schools Athletic Foundation, Inc. (CESAFI) All Star-RP Team ang ilang kaatbang nga Singaporean national squad sa iksor, 75-60 atol sa nagpdayon nga Kung Sheung Invitational Basketball Tournament kagahapon didto sa Queen Elizabeth Stadium sa Hongkong.
Wala’y laing gihatag nga detalye kalabot sa maong kadaugan gikan sa email sa usa ka Eugene Fong nga usa ka tournament official didto sa Hongkong ug wala sab malakip paghatag ang puntos kada usa sa Singapore team.
Si Alfred Belande sa SWU Cobras ug si June Mar Fajardo sa UC Webmasters parehong may 15 puntos alang sa CESAFI All-Star.
Laing naka-iskor og double figures mao sila si Manny Gabas ug si Jabe Delfino nga parehong gikan sa USJ-R Jaguars ug parehong may 11 puntos.
Si Ranulfo Malinao nga gikan sab sa Jaguars may siyam ka puntos, si Art Diango sa SWU may unom ka puntos, si Armand Ponce may upat ka puntos ug sila si Eulogio Lasala, Jr. ug John Emel Rowe may tagurha ka puntos.
Ang wala makapuntos mao sila si Chris Victor Diputado, Moncrief Rogado ug Ricmar Pertubos. - Gabby G. Malagar (BANAT NEWS)